ក្នុងរយៈពេល ៩ថ្ងៃកន្លងមកនេះ អ្នកស្ម័គ្រចិត្តចំនួន ៤៥០នាក់ ដែលភាគច្រើនមកពីវិស័យបច្ចេកវិទ្យា បានដាក់ការងារក្នុងវិស័យឯកជនរបស់ពួកគេមួយឡែកសិន ដើម្បីព្យាយាមជួយស្វែងរកពលរដ្ឋអ៊ីស្រាអែល ដែលបាត់ខ្លួន បន្ទាប់ពីមានការវាយប្រហារដោយក្រុមហាម៉ាស ដែលបានសម្លាប់មនុស្សយ៉ាងហោចណាស់ ១.៣០០នាក់ ជាថ្ងៃតែមួយ ដែលមានមនុស្សស្លាប់ច្រើនបំផុត នៅក្នុងរដ្ឋនៃប្រវត្តិសាស្រ្ត ៧៥ឆ្នាំរបស់អ៊ីស្រាអែល។

អ៊ីស្រាអែលត្រូវទទួលបានភាពល្បីល្បាញដោយសារវិស័យបច្ចេកវិទ្យាដ៏ទំនើបខ្លាំងរបស់ខ្លួន ដែលជាកត្តាជំរុញដ៏សំខាន់នៃសេដ្ឋកិច្ចរបស់អ៊ីស្រាអែល ខណៈដែលសន្តិសុខតាមអ៊ីនធឺណិត ត្រូវបានចាត់ទុកថា ជាឧស្សាហកម្មឈានមុខគេមួយរបស់វិស័យនេះ។

អ្នកស្ម័គ្រចិត្ដបានបង្កើតនូវអ្វី ដែលគេហៅថា «បន្ទប់សង្គ្រាម» ដែលពួកគេកំពុងប្រើប្រាស់បច្ចេកវិទ្យាទំនើបបំផុត រួមមានបញ្ញាសិប្បនិមិត្ត (AI) ការសម្គាល់មុខ និងការសម្គាល់សំឡេង ដើម្បីជួយស្វែងរកអ្នកបាត់ខ្លួន និងចំណាប់ថ្នូរជិត ២០០នាក់។

រហូតមកដល់ពេលនេះ ជនស៊ីវិលបានទទួលជោគជ័យ ក្នុងការតាមដានមនុស្សជាងរាប់រយនាក់ ហើយប្រប្រធាននៃបន្ទប់សង្គ្រាមស៊ីវិលនេះ លោកស្រី Karine Nahon បានប្រាប់សារព័ត៌មាន Reuters ថា ការតាមដាននេះបានក្លាយជាប្រភពព័ត៌មានដ៏សំខាន់សម្រាប់រដ្ឋាភិបាល៕