កាលពីថ្ងៃទី១៧ ខែតុលា ឆ្នាំ២០២៣ គណ:ប្រតិភូរដ្ឋសភាកម្ពុជាក្នុងក្របខណ្ឌ(CLV) ដឹកនាំ​ដោយ​ឯកឧត្តម សួស យ៉ារ៉ា ប្រធានគណ:កម្មការកិច្ចការបរទេស សហប្រតិបត្តិការអន្តរជាតិ ឃោសនា​ការ និងព័ត៌មាន នៃរដ្ឋសភា បានអញ្ជើញទៅទស្សនកិច្ចក្នុងតំបន់ត្រីកោណ ដោយ​មាន​ការ​ចូលរួមពីតំណាងរាស្ត្រនៃរដ្ឋសភាប្រទេសវៀតណាម និងឡាវផងដែរ។

សូមបញ្ជាក់ថា សមាជិកគណៈប្រតិភូសភាកម្ពុជាទាំងអស់មកពីបីគណៈកម្មការ សរុប៨រូប រួមមាន គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និង​ព័ត៌មាន​(ឯកឧត្ដម សួស យ៉ារ៉ា ឯកឧត្ដម ទីសុគន្ធ ឯកឧត្ដម ស៊ន សារ៉ាណា និងឯកឧត្ដម សុះ មុះសិន) គណៈកម្មការមហាផ្ទៃ ការពារជាតិ និងមុខងារសាធារណ:(ឯកឧត្តម កែប ជុតិមា និងលោកជំទាវ អ៊ុន សុគន្ធា) គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម(ឯកឧត្តម ស៊ូ ភិរិន្ទ និង​ឯកឧត្ដម ឈឹម ម៉ា)។

ទទួលស្វាគមន៍គណៈប្រតិភូរដ្ឋសភាកម្ពុជានៅច្រកទ្វារអន្តរជាតិអូរយ៉ាដាវពីសំណាក់ភាគីវៀតណាម មានឯកឧត្តម ឡេ អាញ់ ទួន(Lê Anh Tuấn) អនុប្រធាន​ប្រចាំ​ការ​គណៈកម្មការ​កិច្ច​ការ​បរទេស​រដ្ឋសភានៃសាធារណរដ្ឋសង្គមនិយមវៀតណាម ឯកឧត្តម អភិបាលរងខេត្ត ហ្សា ឡាយ លោក ហ្វាម ហ័ងហាយ ប្រធាននាយកដ្ឋានកិច្ចការបរទេសនៃរដ្ឋសភាវៀតណាម និង​សហការី​ជា​ច្រើន​រូប​ទៀត។

ក្រោយពីបានឡើងទៅដល់លើកំពូលភ្នំ ដែលមានស្ដូបឈ្មោះប្រទេសទាំងបីរួចមក គណៈ​ប្រតិភូ​បាន​បន្ត​ទៅទស្សនាស្វែងយល់អំពីរោងចក្រQuicornac ដែលជារោងចក្រកែច្នៃផ្លែផាស់សិន។ នេះ​ជា​គម្រូ​នៃ​ការអភិវឌ្ឍមួយដែលអាចផ្ដល់ជាគំនិតអភិវឌ្ឍន៍នៅ​នឹងកន្លែង​សម្រា​ប់​ខេត្ត​ជាប់​ព្រំដែន​ផ្សេង​ទៀត។

សូមជម្រាបជូនថា នេះជាលើកទី១ និងជាថ្ងៃប្រវត្តិសាស្ត្រដែលរដ្ឋសភានៃប្រទេសទាំងបី កម្ពុជា-ឡាវ-វៀតណាម បានអញ្ជើញធ្វើទស្សនកិច្ចរួមគ្នាទៅកាន់តំបន់ត្រីកោណអភិវឌ្ឍន៍ ដែលស្ថិត​នៅ​ក្រោម​គំនិតផ្តួចផ្ដើមមួយរបស់ សម្តេចអគ្គមហាសេនាបតីតេជោ ហ៊ុន សែន ដើម្បីកសាង​ព្រំដែន​សន្តិភាព និង​អភិវឌ្ឍន៍ប្រកបដោយចីរភាពរវាងប្រទេសទាំងបី។ សម្រាប់ថ្ងៃទី១ នៃដំណើរ​ទស្សន​កិច្ច​នេះ គណៈប្រតិភូនៃរដ្ឋសភាកម្ពុជាក៏បានសង្កេតឃើញ និងកោ​តសរសើរដល់ប្រទេស​វៀតណាម​ដែល​បានធ្វើការអភិវឌ្ឍហេដ្ឋារចសម្ព័ន្ធផ្លូវថ្នល់ជាប់ព្រំដែនបានល្អ ជាពិសេស​បាន​ចាប់​ផ្តើម​ធ្វើកា​រ​អភិវឌ្ឍថាមពលអគ្គិសនីកកើតឡើងវិញ ដោយបានកសាងបង្គោល​ផលិត​អគ្គិសនី​ដើរ​ដោយ​កម្លាំងខ្យល់ជាច្រើនបង្គោលនៅលើកំពូលភ្នំ ក្នុងខេត្តជាប់ព្រំដែន៕