ជម្លោះអ៊ីស្រាអែល-ប៉ាឡេស្ទីន ដែលកាន់តែរីកធំ បានឆក់យកជីវិតមនុស្សជាង៤.៤០០នាក់ នៅភាគីទាំងសងខាង ខណៈជម្លោះនេះចូលដល់ថ្ងៃទី១២ នៅថ្ងៃពុធនេះ។

អាជ្ញាធរសុខាភិបាលប៉ាឡេស្ទីន បាននិយាយកាលពីថ្ងៃអង្គារថា ពលរដ្ឋប៉ាឡេស្ទីនសរុប ៣.០៦១ នាក់ បានស្លាប់ នៅក្នុងជម្លោះនេះ ដោយជាង១៣.៧៥០នាក់ផ្សេងទៀត បានរងរបួស។

ទន្ទឹមនឹងនេះ ប្រព័ន្ធផ្សព្វផ្សាយអ៊ីស្រាអែល បានរាយការណ៍ថាចំនួនអ្នកស្លាប់នៅភាគីអ៊ីស្រាអែល បានកើនឡើងដល់ជាង១.៤០០នាក់ និង៤.២២៩នាក់ផ្សេងទៀត បានរងរបួស។

យោងតាមការរាយការណ៍របស់ប្រព័ន្ធផ្សព្វផ្សាយអន្តរជាតិកាលពីថ្ងៃអង្គារបានឲ្យដឹងថា ការវាយប្រហារតាមអាកាសរបស់អ៊ីស្រាអែល បានសម្លាប់មេបញ្ជាការជាន់ខ្ពស់ប្រដាប់អាវុធរបស់ក្រុមហាម៉ាស់លោក Ayman Nofal នៅក្នុងតំបន់ហ្គាហ្សា ខណៈការបាញ់រាំងនៃការវាយប្រហារនោះ បានធ្លាក់ចូលទៅក្នុងជំរំ Bureij ភាគកណ្តាល។

លោក Nofal ជាសកម្មប្រយុទ្ធជាន់ខ្ពស់ម្នាក់ ត្រូវបានសម្លាប់នៅក្នុងសង្គ្រាម ហើយការស្លាប់របស់លោក ត្រូវបានប្រកាសដោយក្រុម Izz el-Deen Al-Qassam ប្រដាប់អាវុធកាលពីថ្ងៃអង្គារ។