នៅថ្ងៃព្រហស្បតិ៍នេះ រដ្ឋមន្រ្តីការពារជាតិជប៉ុនលោក Minoru Kihara មាននូវជំនួបទ្វេភាគីជាមួយសមភាគីអូស្រ្តាលីលោក Richard Marles នៅទីក្រុងតូក្យូ ដើម្បីពិភាក្សលើការងារប្រឈមសន្តិសុខនៅក្នុងតំបន់អាស៊ី-ប៉ាស៊ីហ្វិក ។

អំឡុងជំនួបនោះ លោក Marles បាននិយាយប្រាប់លោក Kihara ថា ទំនាក់ទំនងរបស់អូស្រ្តាលី ជាមួយជប៉ុន គឺជាគ្រឹះសម្រាប់ផែនការសន្តិសុខជាតិនាពេលអនាគតរបស់អូស្រ្តាលី ។

គួរឲ្យដឹងថា អូស្រ្តាលី និងជប៉ុន ដែលជាសម្ព័ន្ធមិត្តជិតស្និតជាមួយសហរដ្ឋអាមេរិក បានបង្កើតទំនាក់ទំនងសន្តិសុខជិតស្និតក្នុងរយៈពេលប៉ុន្មានឆ្នាំចុងក្រោយនេះ ស្របពេលដែលវត្តមានយោធាកើនឡើងរបស់ចិន នៅក្នុងតំបន់ឥណ្ឌូ-ប៉ាស៊ីហ្វិក ។

ប្រទេសទាំង ២ បានចុះហត្ថលេខាលើកិច្ចព្រមព្រៀងការពារជាតិជាប្រវត្តិសាស្រ្ត កាលពីដើមឆ្នាំ២០២២ ដើម្បីពង្រឹងទំនាក់ទំនងសន្តិសុខ និងអនុញ្ញាតឲ្យយោធាមកពីអូស្រ្តាលី និងជប៉ុន បង្កើនកិច្ចសហប្រតិបត្តិការលើប្រតិបត្តិការការពារជាតិ និងមនុស្សធម៌ ។

ដោយឡែក កិច្ចប្រជុំថ្នាក់រដ្ឋមន្រ្តី “២+២”រវាងក្រុមន្រ្តីការទូតជាន់ខ្ពស់ និងមន្រ្តីការពារជាតិជាន់ខ្ពស់ មកពីប្រទេសទាំង ២ គ្រោងនឹងរៀបចំឡើងនៅថ្ងៃសុក្រស្អែកនេះ ប៉ុន្តែកាលបរិច្ឆេតខាងលើ ត្រូវបានពន្យាពេលវិញ ដោយសារតែស្ថានភាពនៅតំបន់មជ្ឈិមបូព៌ា ៕