បន្ទាយមានជ័យ៖ រដ្ឋបាលខេត្តបន្ទាយមានជ័យ បានប្រកាសពីការរកឃើញមនុស្សដល់ទៅ ៣៩នាក់បន្ថែមទៀត បានឆ្លងមេរោគកូវីដ-១៩ ហើយអ្នកជំងឺ ២១៦នាក់ទៀត ត្រូវបានព្យាបាលជាសះស្បើយ។
ក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ រដ្ឋបាលខេត្តបន្ទាយមានជ័យបញ្ជាក់ថា ករណីឆ្លងថ្មីទាំង ៣៩នាក់នេះត្រូវបានរកឃើញលើពលករខ្មែរ ៧នាក់ បន្ទាប់ពីពួកគេវិលត្រឡប់មកពីប្រទេសថៃ បុគ្គលិកបម្រើការនៅសហគ្រាស ១៨ជាន់ចំនួន ១០នាក់ បុគ្គលិកបម្រើការងារនៅរោងចក្រហាយថិច ៦នាក់និងបុគ្គលិកបម្រើការនៅសហគ្រាស Grand Diamond ចំនួន ២នាក់។
ក្រៅពីនេះ រដ្ឋបាលខេត្តបន្ទាយមានជ័យ បានបញ្ជាក់ថា ករណីឆ្លងថ្មីផ្សេងទៀត ត្រូវបានរកឃើញលើពលរដ្ឋនៅស្រុកពួកចំនួន ២នាក់ ពលរដ្ឋនៅក្រុងសិរីសោភ័ណ ៣នាក់ អាជីវករនៅក្រុងប៉ោប៉ែត ២នាក់និងពលរដ្ឋនៅស្រុកម៉ាឡៃ ២នាក់។
រដ្ឋបាលខេត្តនេះក៏បានឱ្យដឹងផងដែរថា អ្នកជំងឺកូវីដ-១៩ចំនួន ២១៦នាក់ទៀត ត្រូវបានព្យាបាលជាសះស្បើយនៅថ្ងៃនេះ៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
