ក្រុមជនអន្ធពាលហៃទីគ្រប់គ្រងសាលារៀន គ្លីនិក និងមូលនិធិជំនួសរដ្ឋាភិបាលដែលអវត្តមានកាន់តែខ្លាំងឡើង បើទោះបីជាក្រុមឧក្រិដ្ឋជនរបស់ពួកគេជួយមេដឹកនាំក្រុមអន្ធពាល ប្រមូលថវិកា និងទិញផ្ទះប្រណីតដែលមានអាងហែលទឹកនៅក្នុងប្រទេសក្រីក្របំផុតនៃអឌ្ឍគោលនេះក៏ដោយ។

នោះគឺជាការរកឃើញមួយនៃរបាយការណ៍ដ៏ទូលំទូលាយរបស់អង្គការសហប្រជាជាតិ ដែលបានចេញផ្សាយ កាលពីថ្ងៃពុធ។

របាយការណ៍១៥៦ទំព័រពីក្រុមអ្នកជំនាញរបស់UNបានឲ្យដឹងថា៖«ក្រុមជនអន្ធពាលកាន់តែរឹងមាំ កាន់តែសម្បូរបែប ប្រដាប់អាវុធកាន់តែប្រសើរ និងមានស្វ័យភាពកាន់តែច្រើន»។ របាយការណ៍នោះ បានចង្អុលបង្ហាញពីការជួញដូរអាវុធដែលរកកម្រៃបានយ៉ាងច្រើនពីសហរដ្ឋអាមេរិក ដែលផ្តល់ឲ្យក្រុមជនអន្ធពាល នូវអាវុធដ៏ប្រល័យយ៉ាងច្រើន។

ក្រុមអ្នកជំនាញនេះ បានរិះគន់ការហាមឃាត់អាវុធរបស់អង្គការសហប្រជាជាតិ «គ្មានប្រសិទ្ធភាព» ហើយបានបញ្ជាក់ថា មានប្រទេសមួយចំនួនឆ្លើយតបទៅនឹងសំណើ ដើម្បីតាមដានអាវុធដែលរឹបអូសបានទាំងនោះ។

ក្រុមជនអន្ធពាល បានកាន់តែរឹងមាំឡើង ដោយរួមបញ្ចូលគ្នា នៅក្នុងរដ្ឋធានីជុំវិញសម្ព័ន្ធភាព G9 និង G-Pep ខណៈដែលការប្រយុទ្ធគ្នា កាន់តែកើនឡើងនៅលើដីស្រែចំការភាគខាងជើងសំខាន់ៗ។