កំពង់ឆ្នាំង ៖ រយៈពេល៤១សប្ដាហ៍ឆ្នាំ២០២៣នេះ មន្ទីរសុខាភិបាលខេត្តកំពង់ឆ្នាំង បានរកឃើញជំងឺគ្រុនឈាមចំនួន៤៨១ករណី ក្នុងនោះបណ្ដាលឲ្យស្លាប់កុមារចំនួន២នាក់ផងដែរ។ ការរកឃើញនេះ គឺមានកើនឡើងទ្វេដង បើធៀបនឹងឆ្នាំ២០២២ ដែលមានតែប្រមាណជាង២០០ករណីតែប៉ុណ្ណោះ។ នេះបើយោងតាមការបញ្ជាក់ពីលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង ។

លោកវេជ្ជបណ្ឌិតបានបន្តថា៖ ជំងឺគ្រុនឈាមចាប់ផ្ដើមកើតរាយប៉ាយនៅតាមភូមិ ឃុំ និងស្រុកមួយចំនួនក្នុងខេត្ត ។ កំណើនជំងឺគ្រុនឈាមនេះ តម្រូវឲ្យមានការយកចិត្តទុកដាក់ខ្ពស់ និងចូលរួមពីប្រជាពលរដ្ឋក្នុងការពង្រឹងអនុវត្តវិធានការការពារសុខភាពឲ្យបានល្អចៀសផុតពីជំងឺគ្រុនឈាម ដោយសារសត្វមូសខ្លាញីខាំ ដែលបានកើតឡើងដោយពពួកដង្កូវទឹក ។ ពាក់ព័ន្ធជំងឺគ្រុនឈាមឆ្នាំនេះ គឺមានប្រមាណ៤៨១ករណី ក្នុងរយៈពេល៤១សប្តាហ៍ និងមានកុមារស្លាប់ចំនួន២នាក់។ បើផ្អែកតាមតួលេខខាងលើនេះ ឃើញថាជំងឺគ្រុនឈាមឆ្នាំនេះមានការកើនឡើងទ្វេដងបើធៀបនឹងឆ្នាំមុន ។ ដើម្បីឲ្យប្រជាពលរដ្ឋមានវិធានទប់ស្កាត់នៅមូលដ្ឋានរបស់ខ្លួន ក៏ដូចជាឲ្យអាជ្ញាធរមានការយកចិត្តទុកដាក់លើបញ្ហានេះ ត្រូវនាំគ្នាប្រុងប្រយ័ត្ន ហើយបើមានការសង្ស័យថាមានគ្រុនក្ដៅ ត្រូវទៅពេទ្យព្យាបាលជាបន្ទាន់ ដោយលោកវេជ្ជបណ្ឌិតមិនលើកទឹកចិត្តឲ្យព្យាបាលនៅផ្ទះខ្លួនឯងឡើយ។

 លោកវេជ្ជបណ្ឌិតបានបន្ថែមថា៖ ជំងឺគ្រុនឈាម បានគំរាមដល់មនុស្សគ្រប់វ័យ ដែលបង្កឡើងដោយសត្វមូសខ្លាញីខាំចម្លងមេរោគគ្រុនឈាមពីមនុស្សម្នាក់ទៅមនុស្សម្នាក់ទៀត ។ តាមការស្រាវជ្រាវរបស់អ្នកជំនាញ មូសខ្លាចូលចិត្តបង្កកំណើតពងកូននៅក្នុងសំបកកង់រថយន្ត និងសំបកកង់ម៉ូតូចាស់ៗ ច្រើនជាងវត្ថុដាក់ទឹកសម្រាប់ប្រើប្រាស់ផ្សេងៗ ។ ជំងឺគ្រុនឈាមនេះ គឺកើនឡើងជាង២ដងនៅក្នុងរដូវវស្សា ប្រៀបធៀបនឹងករណីកើតឡើងក្នុងរដូវប្រាំង ហើយមានទំនាក់ទំនងខ្លាំងជាមួយនឹងអាកាសធាតុ ដូចជាកម្តៅចំនួនទឹកភ្លៀង និងសំណើម ។ ដើម្បីឆ្លើយតបនឹងកំណើនជំងឺគ្រុនឈាមឆ្នាំនេះ ក្រសួងសុខាភិបាលក៏បានអំពាវនាវឲ្យប្រជាពលរដ្ឋ និងអាជ្ញាធរមូលដ្ឋាន ត្រូវចូលរួមចលនាកាត់បន្ថយ និងទប់ស្កាត់ការកកើតសត្វមូសនៅតាមលំនៅដ្ឋានអោយបានជាដាច់ខាត៕ ដោយ ៖ កាំង ហុងវាស្នា