ជនជាប់ចោទម្នាក់ក្នុងចំណោមជនជាប់ចោទ ដែលត្រូវបានផ្ដន្ទាទោសឲ្យជាប់ពន្ធនាគារ ពាក់ព័ន្ធនឹងការសម្លាប់កុមារ និងស្ត្រីវ័យក្មេងចំនួន ១៩នាក់ កាលពីជិត ២ទសវត្សរ៍មុន ត្រូវបានដោះលែង នៅថ្ងៃសុក្រ (ទី២០ ខែតុលា) នេះ បន្ទាប់ពីតុលាការឥណ្ឌា បានចេញសាលក្រមឲ្យដោះលែង កាលពីថ្ងៃចន្ទដើមសប្ដាហ៍នេះ។

នគរបាលបានចាប់ខ្លួនពាណិជ្ជករ លោក Moninder Singh Pandher និងអ្នកបម្រើរបស់គាត់ លោក Surender Koli ដែលជាជនសង្ស័យធំ កាលពីខែធ្នូ ឆ្នាំ២០០៦។ នគរបាលសហព័ន្ធ បានប្តឹង ១៣ករណីប្រឆាំងនឹងលោក Koli និង ៦ករណីប្រឆាំងនឹងលោក Pandher ទាក់ទងនឹងការសម្លាប់នេះ។

សូមរំលឹកថា ក្នុងចំណោមបណ្ដាឧក្រិដ្ឋកម្មដ៏គួរឲ្យរន្ធត់បំផុត នៅប្រទេសឥណ្ឌា ឃាតកម្មនេះបានធ្វើឲ្យកក្រើកពេញផ្ទៃប្រទេស នៅពេលដែលរឿងរ៉ាវនេះ ត្រូវបានគេដឹងយ៉ាងសុសសាយ បន្ទាប់ពីបំណែកសាកសព ដែលច្រកក្នុងថង់ប្លាស្ទិក ត្រូវបានរកឃើញកប់នៅក្នុងទីធ្លា និងលូបង្ហូរទឹកនៃគេហដ្ឋានរបស់លោក Pandher ក្នុងភូមិ Nithari នៅជាយក្រុង New Delhi។

តុលាការជាន់ខ្ពស់ប្រចាំទីក្រុង Allahabad កាលពីថ្ងៃចន្ទ បានសម្រេចឲ្យជនជាប់ចោទ Koli រួចទោស ពាក់ព័ន្ធនឹងបទចោទ ១២ករណី និងលោក Pandher ២ករណី ហើយបានទុកជាមោឃនូវការកាត់ទោសប្រហារជីវិតរបស់តុលាការ៕