ភ្នំពេញ៖ តាមរយៈកិច្ចសហប្រតិបត្តិល្អក្នុងការកសាងសមត្ថភាពគ្រូបង្គោល និង​អភិវឌ្ឍ​ផ្នែក​អប់រំ​បណ្ដុះ​បណ្ដាល​បច្ចេកទេសនិងវិជ្ជាជីវៈ (TVET) ប្រកបដោយលទ្ធផលគាប់ប្រសើរនោះ វិទ្យាស្ថាន​​អប់រំបណ្ដុះបណ្ដាលបច្ចេកទេស ហៅកាត់ ITE នៃប្រទេសសិង្ហបុរី បានប្រគល់​ពាន​រង្វាន់​ «កិច្ចសហប្រតិបត្តិល្អក្នុងការកសាងសមត្ថភាពគ្រូបង្គោល និងអភិវឌ្ឍ​ផ្នែក​អប់រំ​បណ្ដុះ​បណ្ដាល​បច្ចេកទេសនិងវិជ្ជាជីវៈ ឬហៅថា ធីវ៉េត (TVET)» ជូនដល់ក្រសួងការងារ និងបណ្ដុះ​បណ្ដាល​វិជ្ជាជីវៈកម្ពុជា។

តាមក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី២១ តុលា ឆ្នាំ២០២៣នេះ បាន​បញ្ជាក់​ថា ការប្រគល់ពានរង្វាន់នេះ ធ្វើ​ឡើង​ក្នុង​ឱកាស​ខួប​លើក​ទី២០ នៃ​ការ​ផ្ដល់​សេវា​អប់រំ​បណ្ដុះ​បណ្ដាលរបស់វិទ្យាស្ថានអប់រំបណ្ដុះបណ្ដាលបច្ចេកទេស ហៅកាត់ ITEES។ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បាន​ឡើង​ទទួល​ពាន​រង្វាន់​នេះ​ដោយ​ផ្ទាល់​ពី​លោក ហឹង ឈាំងនី (Heng Chiang Gnee) នាយកវិទ្យាស្ថាន ITE។

នា​ឱកាសនោះ ឯកឧត្តមរដ្ឋមន្ត្រីក៏បានថ្លែងអំណរគុណចំពោះវិទ្យាស្ថាន ITE និង ITEES ដែល​បាន​ប្រគល់​ពានរង្វាន់កិច្ចសហប្រតិបត្តិល្អក្នុងការកសាងសមត្ថភាពគ្រូបង្គោល និងអភិវឌ្ឍ​ផ្នែក​អប់រំ​បណ្ដុះបណ្ដាលជំនាញបច្ចេកទេសនិងវិជ្ជាជីវៈ (TVET) ដល់ក្រសួងការងារ និង​បណ្ដុះ​បណ្ដាល​វិជ្ជាជីវៈ។ឯកឧត្តមបានសង្កត់ធ្ងន់ថា រាជរដ្ឋាភិបាល​កម្ពុជា​នៅ​តែ​បន្ត​ពង្រឹង​កិច្ច​សហប្រតិបត្តិការលើការបណ្ដុះបណ្ដាលជាមួយវិទ្យាស្ថាន ITE និង ITEES ដើម្បី​រួម​ចំណែក​អភិវឌ្ឍ​​ធនធានមនុស្សនៅកម្ពុជា។

គួរជម្រាបថា វិទ្យាស្ថាន ITE បាន​ដើរ​តួនាទី​យ៉ាង​សំខាន់​ក្នុង​ការ​អភិវឌ្ឍ​សមត្ថភាព​ធន​ធាន​មនុស្ស​នៅ​ប្រទេស​មួយ​ចំនួន ក្នុងនោះរាជរដ្ឋាភិបាលកម្ពុជាក៏បានសហការជាមួយវិទ្យាស្ថាននេះផងដែរ។ កិច្ច​សហប្រតិបត្តិការរវាងក្រសួងការងារ និងបណ្ដុះបណ្ដាលវិជ្ជាជីវៈ ជាមួយវិទ្យាស្ថាន ITE របស់​សិង្ហបុរី​បានសម្រេចនូវផ្លែផ្កាគួរឱ្យកត់សម្គាល់ ពិសេស​លើ​ការ​បណ្ដុះ​បណ្ដាល​ពង្រឹង​សមត្ថភាព​ដល់​មន្ត្រី​រាជការ គ្រូបង្គោល TVET និងមន្ត្រីគ្រប់គ្រងនៅតាមគ្រឹះស្ថាន TVET នានារបស់កម្ពុជា៕