កងទ័ពប្រទេសអ៊ីស្រាអែល កាលពីថ្ងៃសុក្របានបង្ហាញទីតាំងលាក់អាវុធ និង​គ្រឿង​ផ្គត់​ផ្គង់​ដ៏​ច្រើន​ ដែលរឹបអូសបានពីក្រុមសកម្មប្រយុទ្ធហាម៉ាស់ ក្នុងពេលការវាយប្រហារកាលពីថ្ងៃទី ៧ ខែ​តុលា​។ សព្វាវុធ ​ដែលរឹបអូសបាន រួមមានគ្រាប់បែកដៃ គ្រាប់មីន និងអាវុធប្រភេទបេ RPG។

យោង​តាម​ឧត្តមសេនីយ៍ឯករបស់កងទ័ពអ៊ីស្រាអែលបានឲ្យដឹងថា យុទ្ធភ័ណ្ឌផ្ទុះ និងអាវុធ ដែល​កំពុង​ដាក់​តាំងបង្ហាញ មានត្រឹមតែ ១០ ភាគរយនៃចំនួនសរុបដែលរឹបអូសបាន ខណៈ​អ្នក​ប្រយុទ្ធ​ក្រុម​ហាម៉ាស់ អាចរៀបចំប្រើប្រាស់ ៣០ភាគរយ នៃ​អាវុធ​របស់​ពួក​គេ​ក្នុង​អំឡុង​ពេល​ការ​វាយ​ប្រហារ​ទៅ​លើអ៊ីស្រាអែល។

កងទ័ពអ៊ីស្រាអែល បាននិយាយថា ពួកគេបានរកឃើញឧបករណ៍វេជ្ជសាស្ត្រ និងស្បៀង​អាហារ​យ៉ាង​ច្រើន​ នៅក្នុងយានយន្តរបស់ក្រុមហាម៉ាស ដែលបង្ហាញ​ថា​ក្រុម​នេះ​បាន​រៀប​ចំ​សម្រាប់​សង្គ្រាម​រយៈ​ពេលវែង។

ប្រទេសអ៊ីស្រាអែល កំពុងត្រៀមខ្លួនសម្រាប់សង្រ្គាមលើដីគោកនៅក្នុងតំបន់ហ៊ុមព័ទ្ធតូចមួយ និង​មានម​នុស្សច្រើនរបស់ប៉ាឡេស្ទីន ដែលមានគោលដៅកម្ទេចក្រុមហាម៉ាស ជាក្រុម​សកម្ម​ប្រយុទ្ធ​អ៊ីស្លាម​និយម ដែលបានវាយសម្រុកចូលទីក្រុងជាច្រើនរបស់អ៊ីស្រាអែលកាលពីថ្ងៃទី ៧ តុលា ដោយ​បាន​បណ្តាលឲ្យមនុស្ស ១.៤០០ នាក់ស្លាប់ និងចាប់មនុស្សច្រើននាក់ទៀតជាចំណាប់ថ្នូរ៕