ក្រសួងការពារជាតិចិន បាននិយាយកាលពីថ្ងៃសុក្រថា សេចក្តីថ្លែងការណ៍​របស់​ក្រសួង​ការពារ​ជាតិ​សហរដ្ឋអាមេរិក ដែលចោទប្រកាន់យោធារបស់ខ្លួនពីបទស្ទាក់ចាប់នៅលើដែនអាកាសថា «មានហានិភ័យ និងដោយបង្ខិតបង្ខំ» ដែល​មាន​ចេតនា​លាប​ពណ៌​មក​លើ​ប្រទេស​ចិន​ដោយ​ហេតុ​ផល​នយោបាយលាក់កំបាំង។ ក្រសួង បាននិយាយនៅក្នុងសេចក្តីថ្លែងការណ៍ថា ប្រទេសចិន ប្រឆាំង​ដាច់ខាតចំពោះបញ្ហានេះ ហើយបានដាក់បង្ហាញយ៉ាងរឹងមាំទៅកាន់ភាគីសហរដ្ឋអាមេរិក។ ក្រសួងការពារជាតិសហរដ្ឋអាមេរិកបាននិយាយកាលពីថ្ងៃអង្គារថា យន្តហោះ​ចម្បាំង​របស់​ប្រទេស​ចិន បានចូលពាក់​ព័ន្ធ​កាន់​តែ​ខ្លាំង​ឡើង​នៅ​ក្នុង​ឥរិយាបថ​ប្រតិបត្តិការ​បង្ខិតបង្ខំ និង​មាន​ហានិភ័យ​នៅ​ក្នុងតំបន់ឥណ្ឌូ-ប៉ាស៊ីហ្វិក ចាប់តាំងពីឆ្នាំ ២០២១ មក ។

ក្រសួងបាននិយាយថា ការស្ទាក់ចាប់ដោយគ្មានសុវត្ថិភាពចំពោះយន្តហោះអាមេរិក និងសម្ព័ន្ធមិត្ត នៅ​ក្នុងដែនអាកាសអន្តរជាតិ គឺជាយុទ្ធនាការរួមគ្នានិងធ្វើមជ្ឈការដោយមន្ត្រីចិន ដើម្បីបង្ខិតបង្ខំ ឱ្យ​មាន​ការផ្លាស់ប្តូរសកម្មភាពប្រតិបត្តិការដោយស្របច្បាប់របស់សហរដ្ឋអាមេរិក។ ក្រសួង​ការពារ​ជាតិ​ចិន បាននិយាយឆ្លើយតបថា សហរដ្ឋ​អាមេរិក​បាន​ព្រួយ​បារម្ភ​ចំពោះ​ការ​គំរាម​កំហែង​របស់​យោធាចិន ដែលខ្លួនបាននិយាយថាពុំមានឡើយនៅពេលបច្ចុប្បន្ន។

ក្រសួងនិយាយថា មូលហេតុឫសគល់នៃបញ្ហាសន្តិសុខដែនសមុទ្រ និងយោធាដែនអាកាស រវាង​ប្រទេស​ចិន និងសហរដ្ឋអាមេរិក គឺដោយសារការពិតនោះថា នាវាចម្បាំង​ និង​យន្តហោះ​របស់​សហរដ្ឋ​អាមេរិក បានចូលមកជិតមាត់ទ្វារផ្ទះរបស់ចិនពីចម្ងាយ ដើម្បីបង្កបញ្ហា និង​ជា​ការ​បង្ក​រឿង​៕