សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បាន​សម្តែង​ការ​ព្រួយ​បារម្ភ និងមានការសោកស្តាយចំពោះជម្លោះនៅមជ្ឈឹមបូព៌ា ដែលបា​ន​បណ្តាល​ឲ្យ​មនុស្ស​ស្លូត​ត្រង់​ជា​ច្រើននាក់បាត់បង់ជីវិត ហើយសម្តេចនាយករដ្ឋមន្រ្តីសង្ឃឹមថា ប្រទេស​ជា​សមាជិក នៃ​ក្រុម​ប្រឹក្សា​សហប្រតិបត្តិការឈូងសមុទ្រមានតួនាទីសមស្របបំផុត ក្នុង​ការ​ជំរុញ​ឲ្យ​ភាគី​ពាក់ព័ន្ធ​ទាំង​អស់​រក្សាភាពអត់ធ្មត់ ឈានទៅរកកិច្ចព្រមព្រៀងឈប់បាញ់គ្នា។

ការលើកឡើងរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជានេះ គឺបានធ្វើឡើងនៅក្នុង កិច្ច​ប្រជុំ​«កំពូលអាស៊ាន-ក្រុមប្រឹក្សាសហប្រតិបត្តិការឈូងសមុទ្រ» ដែល​បាន​រៀបចំ​ឡើង​នៅ​ទីក្រុង​រីយ៉ាដ នៃព្រះរាជាណាចក្រអារ៉ាប៊ីសាអូឌីត កាលពីថ្ងៃទី២០ ខែតុលា ឆ្នាំ ២០២៣នេះ។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ស្តីពី «លទ្ធផ​ល នៃ​កិច្ចប្រជុំកំពូលអាស៊ាន-ក្រុមប្រឹក្សាសហប្រតិបត្តិការឈូងសមុទ្រ» ដែល​ទើប​ចេញ​នា​ថ្ងៃ​ទី២១ ខែតុលា នេះបានឲ្យដឹងថា នៅក្នុងកិច្ចប្រជុំខាងលើនេះ សម្តេចធិបតី ហ៊ុន ម៉ាណែត នាយក​រដ្ឋមន្រ្តីកម្ពុជា «បានសម្តែងនូវការព្រួយបារម្ភ និងសោក​ស្តាយ​ចំពោះ​ការ​កើន​ឡើង​នៃ​ជម្លោះ និង​អំពើហិង្សានៅ ក្នុងតំបន់មជ្ឈឹមបូព៌ា ដែល​បណ្តាល​ឲ្យ​ជន​ស្លូត​ត្រង់​ជា​ច្រើន​បាត់​បង់​ជីវិត​ ដោយក្នុងនោះក៏មានពលរដ្ឋខ្មែរមួយរូប ដែលជានិស្សិតសិក្សានៅអ៊ីស្រាអែលផងដែរ»។

តាមរយៈសេចក្តីប្រកាសព័ត៌មានរបស់ក្រសួងការបរទេសដដែលនេះ សម្តេចធិបតី ហ៊ុន ម៉ាណែត ក៏បាន​បង្ហាញ​នូវជំនឿយ៉ាងមុតមាំផងដែរថា ប្រទេសជាសមាជិក​ នៃ​ក្រុម​ប្រឹក្សា​សហប្រតិបត្តិការ​ឈូង​សមុទ្រ​មានតួនាទីសមស្របបំផុត ក្នុងការ​ជំរុញ​ឲ្យ​ភាគី​ពាក់ព័ន្ធ​ទាំងអស់​មាន​ការ​អត់​ធ្មត់​ខ្ពស់​បំផុត និងចាប់ផ្តើមកិច្ចសន្ទនា ក្នុងការឈានទៅរកិច្ចព្រមព្រៀងកិច្ចឈប់បាញ់ ដើម្បី​ត្រួស​ត្រាយ​ផ្លូវ​សម្រាប់​ការស្វែង រកដំណោះស្រាយដោយសន្តិវិធី, យុត្តិធម៌ និងយូរអង្វែង។

ជាមួយគ្នានោះដែរ សម្តេចធិបតី ហ៊ុន ម៉ាណែត ក៏បានសង្កត់ធ្ងន់ផងដែរទៅលើភាពចាំបាច់នៃការ ធានា​ដល់ការបញ្ជូនជំនួយមនុស្សធម៌ឲ្យបានពេញលេញ និងទាន់ពេលវេលា ទៅដល់ប្រ​ជាជន​នៅ​ក្នុងតំបន់​ហ្កាហ្សា និងការធានាសុវត្ថិភាព និងការដោះលែង​ចំណាប់​ខ្មាំង​ទាំង​អស់​ឲ្យ​បាន​ឆាប់​បំផុត​ ស្របតាមច្បាប់មនុស្សធម៌អន្តរជាតិផងដែរ៕ អត្ថបទ៖ បាន ចក់