លោក Mark Steven Hughes នាយកទទួល​បន្ទុក​ការងារ​ប្រតិបត្តិការ​ទីភ្នាក់ងារ​ជាតិ​ប្រឆាំង​ឧក្រិដ្ឋកម្ម នៃ​ចក្រភពអង់គ្លេស ដែលហៅកាត់ថា NCA បាន​ថ្លែង​អំណរគុណ​ចំពោះ​នគរបាល​ជាតិ​កម្ពុជា ដែលបានអន្តរាគមន៍ជួយសង្រ្គោះពលរដ្ឋខ្លួនដែលរស់នៅកម្ពុជា និងបាន​អគុណ​ចំពោះ​កម្ពុជា​ដែល​បានខិតខំស្រាវជ្រាវ ស្វែងរកចាប់ខ្លួនជន​ល្មើស​គ្រឿងញៀន​ចាប់​បញ្ជូន​ឲ្យ​អង់​គ្លេស ដើម្បី​អនុវត្តច្បាប់។

នៅក្នុងកិច្ចជំនួបទ្វេភាគីជាមួយ នាយឧត្តមសេនីយ៍ ស ថេត អគ្គស្នងការនគរបាលជាតិកម្ពុជា កាល​ពីកាលពីកន្លងទៅ នៅប្រទេសឡាវ ខណៈដែល​ភាគី​ទាំង​ពីរ​អញ្ជើញ​ទៅ​ចូលរួម​សន្និសីទ​អាស៊ាន​ណាប៉ូល លើកទី៤១ ដែលប្រ ទេសឡាវធ្វើជាម្ចាស់ផ្ទះនោះ លោក Mark Steven Hughes បានវាយតម្លៃ​ខ្ពស់​ចំពោះ​ការផ្តល់​កិច្ច​សហការ​ជាមួយ​តំណាង​ NCA នៅ​ក្នុង​តំបន់ និង​បាន​ថ្លែង​អំណរគុណជូនអគ្គស្នងការដ្ឋាននគរបាលជាតិកម្ពុជា ដែលបានជួយ​អន្តរាគមន៍​សង្គ្រោះ​ពលរដ្ឋ​អង់គ្លេស ស្រាវជ្រាវបង្ក្រាបជនល្មើសគ្រឿងញៀន និងបានចាប់​ប្រគល់​ជូន​អាជ្ញាធរ​អង់គ្លេស ដើម្បី​អនុវត្តច្បាប់។ ជាងនេះទៅទៀត លោក Mark Steven Hughes បានកោត​សរសើរ​ចំពោះ​នាយកដ្ឋានជំនាញពាក់ព័ន្ធនៃអគ្គស្នងការដ្ឋាននគរបាលជាតិកម្ពុជា ដែល​បាន​ធ្វើ​ការ​ផ្លាស់ប្តូរព័ត៌មានឈានទៅទប់ស្កាត់ និងបង្ក្រាប​ជន​ល្មើស​ផ្លូវ​ភេទ​កុមារ​ទាំង​ការ​ទប់​ស្កាត់​មិន​ឲ្យ​ចូល​ប្រទេស ក៏ដូចជាការសហការស្រាវជ្រាវប្រមូលភស្តុតាងជូនទៅអាជ្ញាធរអង់គ្លេស ដើម្បីបន្ត​នីតិ​វិធី​ច្បាប់ចំពោះមុខសញ្ញាប្រព្រឹត្តផ្លូវភេទកុមារបានយ៉ាងមានប្រសិទ្ធភាពផងដែរ។

ថ្លែងនៅក្នុងកិច្ចជំនួបនោះដែរ នាយឧត្តមសេនីយ៍ ស ថេត ក៏បាន​ឯកភាព​ចំពោះ​ការ​លើក​ឡើង​របស់​ភាគី NCA និងបានបញ្ជាក់ជូនអំពីការបន្តផ្តល់កិច្ចសហការទាំងនេះ ឲ្យកាន់តែជិតស្និទ្ធ ទូលំ​ទូលាយ និងមានភាពស៊ីជម្រៅបន្ថែមទៀត។ ជាមួយគ្នានេះនាយឧត្តមសេនីយ៍ អគ្គស្នង​ការ​នគរជាតិ​ក៏​បានស្នើឲ្យភាគីNCA ពិនិត្យលទ្ធភាព ធ្វើការបណ្តុះបណ្តាល ឬជួយគាំទ្រជាឧបករណ៍ សម្ភារ​បច្ចេកទេស បំពាក់បន្ថែម​ជូន​ក្រុម​ការងារ​ទទួល​បណ្តឹង​បទ​ល្មើស​ឆបោក​តាម​ប្រព័ន្ធ​អន​ឡាញ​ដែល​អគ្គស្នងការដ្ឋាននគរបាលជាតិទើបនឹងបង្កើតឡើង។

 ក្រោយមានការស្នើសុំ អគ្គស្នងការនគរបាលជាតិកម្ពុជា លោក Mark Steven Hughes បា​ន​គាំទ្រ​ចំពោះការស្នើសុំរបស់ភាគីកម្ពុជា ដោយបាន​ត្រៀម​រៀប​ចំ​កម្ម​វិធី​បញ្ជូន​មន្រ្តី​ជំនាញ​មក​សហការ​ផ្ទាល់​ជាមួយកម្ពុជានាពេលខាងមុខឆាប់ៗនេះផងដែរ៕ អត្ថបទ៖ បាន ចក់