ទីក្រុងម៉ានីលបានកោះអញ្ជើញឯកអគ្គរដ្ឋទូតរបស់ក្រុងប៉េកាំង នៅថ្ងៃចន្ទ (ទី២៣ ខែតុលា) នេះ ជុំវិញការបុកគ្នាររវាងនាវាហ្វីលីពីននិងចិន នៅសមុទ្រចិនខាងត្បូង ដែលមានជម្លោះ។

ប្រទេសទាំង២ បានស្តីបន្ទោសគ្នាទៅវិញទៅមក ពាក់ព័ន្ធនឹងហេតុការណ៍ កាលពីថ្ងៃអាទិត្យនៅជិតតំបន់កោះថ្មប៉ប្រះទឹក (Second Thomas Shoal) ក្នុងប្រជុំកោះស្ប្រាតលី (Spratly) ដោយភាគីទាំង២ បានបញ្ចេញវីដេអូ ដើម្បីគាំទ្រដល់ការចោទប្រកាន់ដាក់គ្នាទៅវិញទៅមករបស់ខ្លួន។

ការប៉ះទង្គិចគ្នា ២ដង បានកើតឡើងក្នុងអំឡុងពេលបេសកកម្មផ្ដល់គ្រឿងផ្គត់ផ្គង់របស់ប្រទេសហ្វីលីពីនជាប្រចាំដល់កងទ័ពហ្វីលីពីនឈរជើងលើនាវាកងទ័ពជើងទឹក ដែលចតចោល នៅតំបន់កោះថ្មប៉ប្រះទឹក ដើម្បីអះអាងការទាមទារទឹកដីរបស់ទីក្រុងម៉ានីល។

អ្នកនាំពាក្យក្រសួងការបរទេសហ្វីលីពីន លោកស្រី Teresita Daza បានប្រាប់អ្នកសារព័ត៌មានថា៖ «យើងកំពុងប្រើប្រាស់ទាំងស្រុងនូវដំណើរការការទូត ដែលមានសម្រាប់យើង។ ដំណើរការនោះ រួមមានការកោះអញ្ជើញឯកអគ្គរដ្ឋទូតចិន (លោក Huang Xilian) ដែលយើងបានធ្វើនៅព្រឹកនេះ»។

លោកស្រី Daza បានប្រាប់ថា លោកឯកអគ្គរដ្ឋទូតមិនមានវត្តមាននោះទេ ហើយត្រូវបានតំណាងដោយអនុប្រធានបេសកកម្មរបស់លោក អំឡុងកិច្ចប្រជុំ នៅក្រសួងការបរទេសនេះ។ លោក Xilian ត្រូវបានកោះអញ្ជើញលើកចុងក្រោយទៅកាន់ក្រសួងការបរទេសហ្វីលីពីន កាលខែសីហា បន្ទាប់ពីឆ្មាំល្បាតសមុទ្រចិន បានប្រើទុយោបាញ់ទឹកដាក់នាវាហ្វីលីពីន នៅជិតកោះថ្មប៉ប្រះទឹក។

ប្រទេសហ្វីលីពីនបានចោទប្រកាន់នាវាឆ្មាំល្បាតឆ្នេរសមុទ្រចិនថា «បើកពត់ពេនដោយខ្វះការប្រុងប្រយ័ត្ន» រហូតនាំឲ្យមានការប៉ះទង្គិចគ្នាជាមួយទូកឈើ ដែលចុះកិច្ចសន្យាជាមួយកងកម្លាំងប្រដាប់អាវុធហ្វីលីពីន ដើម្បីផ្តល់គ្រឿងផ្គត់ផ្គង់ដល់កងទ័ពនៅលើនាវាចតចោល BRP Sierra Madre៕