ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា កត្តាជីវភាព​រស់នៅ និងសុខុមាលភាពរបស់ប្រជាជនគឺជាកិច្ចការដ៏សំខាន់ និងធំបំផុត​ដែលរាជរដ្ឋាភិបាល​អាណត្តិទី៧នេះ ត្រូវយកចិត្តទុកដាក់​ ខណៈការកសាងមន្ទីរពេទ្យ គឺជាចក្ខុវិស័យប្រកបដោយ​យុទ្ធសាស្ត្រ​វែងឆ្ងាយរបស់រាជរដ្ឋាភិបាល ដើម្បីជាការឆ្លើយតបទាន់សភាពការណ៍នូវតម្រូវការ​ចាំបាច់​របស់ប្រជាជនមិនថា នៅរាជធានីភ្នំពេញ​ ឬនៅតាមបណ្តាខេត្តនានានោះឡើយ។

ការបញ្ជាក់បែបនេះ របស់សម្តេចធិបតី គឺបានធ្វើឡើងក្នុងគ្រាដែលសម្ដេចអញ្ជើញជាធិបតីក្នុង​ពិធី​សម្ពោធ​ដាក់ឱ្យប្រើប្រាស់ជាផ្លូវការ «មន្ទីរពេទ្យជាតិតេជោសន្តិភាព» និងប្រកាសដាក់ឱ្យ អនុវត្ត​ជាផ្លូវការ​នូវកម្មវិធីទី១ នៃគោលនយោបាយជាអាទិភាព​ទាំង៦គឺ«ការពង្រីកវិសាលភាពមូលនិធិសមធម៌​ដល់គ្រួសារងាយរងហានិភ័យ» ​នាព្រឹកថ្ងៃទី២៤ ខែតុលា ឆ្នាំ២០២៣នេះ នៅខណ្ឌព្រែកព្នៅ ​រាជធានីភ្នំពេញ។

សម្តេចធិបតីនាយករដ្ឋមន្រ្តី បានបញ្ជាក់ថា ​វិស័យសុខាភិបាល និងវិស័យអប់រំ គឺនៅតែជាវិស័យ អាទិភាពធំបំផុតក្នុងការយកចិត្តទុកដាក់ពីរាជរដ្ឋាភិបាលនៅអាណត្តិថ្មីនេះ ដោយកត្តាទាំងពីរនេះ​ហើយ ​គឺជាការជំរុញជីវភាពរស់នៅរបស់ប្អូនប្រជាពលរដ្ឋគ្រប់រូប​ឲ្យកាន់​តែល្អប្រសើរបន្ថែមទៀត ស្របទៅតាមយុទ្ធសាស្រ្តទី១ ក្នុងចំណោមទាំង៦ ដែលរាជរដ្ឋាភិបាលប្រកាសដាក់ឲ្យអនុវត្ត​នាពេលនេះ។

សម្តេចធិបតី ហ៊ុន ម៉ាណែត នាយករដ្ឋមន្រ្តី ​ក៏បានបញ្ជាក់ផងដែរថា ការដាក់ឲ្យប្រើប្រាស់​នូវ«មន្ទីរពេទ្យជាតិតេជោសន្តិភាព» នាពេលនេះគឺជាការដោះស្រាយសេវាសុខាភិបាល​ជូន​ដល់បងប្អូន​ប្រជាពលរដ្ឋ គ្រប់ពហុព្យាបាល ហើយមន្ទីរពេទ្យនេះ​ក៏ជាការជួយរែកពុន​ដល់​មន្ទីរពេទ្យផ្សេងៗផងដែរ ​ហើយមួយវិញទៀត«មន្ទីរពេទ្យជាតិ តេជោសន្តិភាព»​ដែលជា​មន្ទីរពេទ្យដ៏ធំ​ហើយអាចដាក់គ្រែអ្នកជំងឺបានជិតមួយម៉ឺននាក់នេះ ​ក៏មិនមែន​សម្រាប់តែបម្រើ​ដល់​បងប្អូនប្រជានពលរដ្ឋនៅក្នុងរាជធានីភ្នំពេញប៉ុណ្ណោះទេ គឺនឹងបម្រើដល់ប្រជាពលរដ្ឋ​គ្រប់រូបទាំង​អស់នៅទូទាំងប្រទេស​ រួមទាំងជនជាតិបរទេស​ដែល​កំពុងរស់នៅ​កម្ពុជាផងដែរ៕អត្ថបទ៖ បាន ចក់