ភ្នំពេញ៖ ក្រុមប្រឹក្សាធម្មនុញ្ញតាមរយៈកិច្ចប្រជុំពេញអង្គ នៅថ្ងៃទី ២៤ ខែតុលា ឆ្នាំ ២០២៣នេះ បានសម្រេចថាសេចក្តីព្រាងច្បាប់បង្កើតរដ្ឋលេខាធិការដ្ឋានអាកាសចរណ៍ស៊ីវិលគឺបានអនុវត្តស្របតាមរដ្ឋធម្មនុញ្ញ។

កិច្ចប្រជុំនេះធ្វើឡើងក្រោមអធិបតិភាពឯកឧត្តមកិត្តិនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ បានដឹកនាំកិច្ចប្រជុំពេញអង្គ ដើម្បីពិនិត្យធម្មនុញ្ញភាពលើការបង្កើតរដ្ឋលេខាធិការដ្ឋានអាកាសចរណ៍ស៊ីវិល។

ក្រោយពីពិភាក្សានិងពិនិត្យយ៉ាងលម្អិត ក្រុមប្រឹក្សាធម្មនុញ្ញ បានសម្រេចជាឯកច្ឆន្ទថា ច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិល ដែលរដ្ឋសភាបានអនុម័ត កាលពីពេលកន្លងទៅស្របតាមច្បាប់កំពូលរបស់កម្ពុជា គឺរដ្ឋធម្មនុញ្ញ។

សូមជម្រាបថា សេចក្តីព្រាងច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិលមាន១១មាត្រា ដោយសេចក្តីព្រាងច្បាប់ថ្មីនេះនឹងជំនួសច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិលឆ្នាំ១៩៩៦ ក្នុងគោលបំណងលើកកម្ពស់ និងធានាដល់ដំណើរការគ្រប់គ្រងចាត់ចែង និងអភិវឌ្ឍន៍វិស័យអាកាសចរណ៍ស៊ីវិលនៃព្រះរាជាណាចក្រកម្ពុជា ស្របតាមស្ថានភាពវិវត្តប្រទេសជាតិ ដែលកំពុងមានការរីកចម្រើន និងការប្រែប្រួលខាងបច្ចេកវិទ្យាអាកាសចរណ៍ស៊ីវិលកាន់តែទំនើប និងស៊ីជម្រៅ រួមទាំងរចនាសម្ព័ន្ធគ្រប់គ្រង ជាពិសេសដើម្បីឆ្លើយតបទៅនឹងលក្ខខណ្ឌតម្រូវបន្ថែមមួយចំនួន ក្នុងនាមជាសមាជិកនៃអង្គការអាកាសចរណ៍ស៊ីវិលអន្តរជាតិ (ICAO) របស់អង្គការសហប្រជាជាតិ។

ក្នុងនាមជាសមាជិកអង្គការ ICAO រដ្ឋលេខាធិការដ្ឋានអាកាសចរស៊ីវិល ត្រូវតភ្ជាប់ខ្លួនទៅនឹងបទដ្ឋានស្តង់ដាអន្តរជាតិ ដែលក្នុងនោះក្របខ័ណ្ឌនៃកាតព្វកិច្ចអន្តរជាតិអង្គការ ICAO បានធ្វើសវនកម្មលើវិស័យអាកាសចរណ៍ស៊ីវិលកម្ពុជា និងបានរកឃើញចំណុចដែលត្រូវបំពេញបន្ថែមពាក់ព័ន្ធនឹងគោលការណ៍ រចនាសម្ព័ន្ធគ្រប់គ្រង និងការចាត់ចែងការងារអាកាសចរណ៍ស៊ីវិល។ ខណៈបច្ចុប្បន្នប្រទេសកម្ពុជាមានអាកាសយានដ្ឋានអន្តរជាតិសំខាន់ៗចំនួន ៣ កំពុងដំណើរការ គឺអាកាសយានដ្ឋានអន្តរជាតិភ្នំពេញ សៀមរាប និងខេត្តព្រះសីហនុ៕អត្ថបទ សេក ឧត្តម