ភ្នំពេញ៖ សមត្ថកិច្ចនៃនាយកដ្ឋាននគរបាលប្រឆាំងបទល្មើសសេដ្ឋកិច្ច បានរឹបអូសប្រេងរំអិល ដែលបានលួចកែច្នៃ ខុសច្បាប់ ជាច្រើនប្រភេទជិត ៤០តោន និងធ្វើការឃាត់ខ្លួនជនសង្ស័យ​ចំនួន​ពីរនាក់ នាំទៅនាយកដ្ឋាននគរបាលប្រឆាំងបទល្នើសសេដ្ឋកិច្ច ដើម្បីបន្តនីតិវិធីច្បាប់។

យោងតាមរបាយការណ៍ ​របស់នាយកដ្ឋាននគរបាលប្រឆាំងបទល្នើសសេដ្ឋកិច្ច ដែល​ទូរទស្សន៍BTVទទួលបាននាថ្ងៃទី២៤ ​ខែតុលា ឆ្នាំ២០២៣នេះ ​បានបញ្ជាក់ថា ថ្ងៃទី២៣ម្សិលមិញ​នេះ​សមត្ថកិច្ចនៃនាយកដ្ឋាននគរបាលប្រឆាំងបទល្មើសសេដ្ឋកិច្ច ​ចូលរួមពីមន្ត្រីជំនាញ ក.ប.ប. កម្លាំងជំនាញការិយាល័យប្រឆាំងបទល្មើស​កម្មសិទ្ធិបញ្ញា​នៃនាយកដ្ឋាននគរបាលប្រឆាំង​បទល្មើសសេដ្ឋកិច្ច, កម្លាំងស្នងការដ្ឋាននគរបាលរាជធានីភ្នំពេញ, រួមទាំងអាជ្ញាធរ​មូលដ្ឋាន​ខណ្ឌព្រែកព្នៅ ដោយមានការ​សម្របសម្រួល​នីតិវិធីផ្ទាល់ដោយ​ លោក សេង ម៉េងស្រ៊ុន ព្រះរាជអាជ្ញារង ​នៃអយ្យការអមសាលាដំបូងរាជធានីភ្នំពេញ ផងបានចុះបង្ក្រាបទីតាំង​សង្ស័យនាំចូល កែច្នៃ វេចខ្ចប់ ប្រេងរំអិលខុសច្បាប់ជាច្រើនប្រភេទ​ នៅផ្លូវទំនប់កប់ស្រូវ សង្កាត់គោករការ ខណ្ឌព្រែកព្នៅ រាជធានីភ្នំពេញ ។

របាយការណ៍ បានបញ្ជាក់ថា ប្រតិបត្តិការនេះគឺបានធ្វើឡើងក្រោយពីការស្ទាក់ឃាត់នូវរថយន្ត​មួយគ្រឿង​ដែលបាន​ដឹកប្រេងរំអិលសង្ស័យ​ខុសច្បាប់ ​ចេញពីទីតាំងខាងលើ ហើយសមត្ថកិច្ចចម្រុះ​ក៏បានបន្តចុះធ្វើការ​ឆែកឆេរ​ត្រួតពិនិត្យជាក់ស្តែង ​ដោយបានរកឃើញ​នូវសម្ភារបំរើឲ្យការងារវេចខ្ចប់ និងប្រេងរំអិល ​ដោយសង្ស័យថា ខុសច្បាប់ជាច្រើនប្រភេទ ​សរុបទាំងអស់ជិត៤០តោន ។

បន្ទាប់ពីបានត្រួតពិនិត្យចប់សព្វគ្រប់ ​លោកព្រះរាជអាជ្ញារង បានសម្រេចឲ្យសមត្ថកិច្ច ធ្វើការដកហូត​សម្ភារសង្ស័យទាំងអស់​ យករក្សាទុកនៅក្នុងឃ្លាំងដាក់សម្ភារមួយកន្លែង នៃ​ទីតាំងខាងលើ និងបិទផ្លំបេរផ្អាកដំណើរការជា​បណ្តោះអាសន្ន ​ដើម្បីធ្វើការពិនិត្យស្រាវជ្រាវបន្ត។ បើតាមរបាយការណ៍ក៏បាន​​បញ្ជាក់ផងដែរថា ម្ចាស់ទីតាំងមិនបានចូលខ្លួនមកសហការ​ជាមួយ​សមត្ថកិច្ចនោះទេ ​ដោយឲ្យត្រឹមអ្នកតំណាងចូលរួមតែប៉ុណ្ណោះ ដូចនេះ​សមត្ថកិច្ចក៏តម្រូវឲ្យ​អ្នកតំណាង​រូបនោះ និងអ្នកបើកបររថយន្តចូលខ្លួនទៅបំភ្លឺនៅនាយកដ្ឋាននគរបាល​ប្រឆាំង​បទល្នើសសេដ្ឋកិច្ច ដើម្បីបន្តនីតិវិធី។

គួរបញ្ជាក់ថា នេះជាប្រតិបត្តិការបង្ក្រាបទីតាំងស្តុកប្រេងរំអិល​ខុសច្បាប់​ជាលើកទីពីរហើយ​ក្នុងរយៈពេល៣ខែចុងក្រោយនេះ​ បន្ទាប់ពីការស៊ើបអង្កេត​ស្រាវជ្រាវរបស់សមត្ថកិច្ចអស់​រយៈពេល​ជាច្រើនខែ កន្លងមកនេះ។

ជាមួយគ្នានេះសមត្ថកិច្ច​សូមអំពាវនាវដល់ប្រជាពលរដ្ឋជាថ្មីម្តងទៀត មេត្តាជួយសហការក្នុងការ​ផ្តល់​ព័ត៌មាន បើសិនជាបានដឹងពីការផលិតកែច្នៃ ឬចែកចាយ​ នូវផលិតផលសង្ស័យថា ខុសច្បាប់ មកដល់​សមត្ថកិច្ចតាមរយៈលេខទូរស័ព្ទ 012 456 966 ​ដើម្បីឲ្យសមត្ថកិច្ចធ្វើការស្រាវជ្រាវ ស៊ើបអង្កេត​ និងឈានដល់ការបង្ក្រាបឲ្យបានទាន់​ពេលវេលា ជៀសវៀងការប៉ះពាល់ផល​ប្រយោជន៍​អ្នក​ប្រើប្រាស់​ ជាពិសេស​សុខុមានភាព​សាធារណៈ៕អត្ថបទបាន ចក់