ភ្នំពេញ ៖ អនុប្រធានទី១ អាជ្ញាធរមីន ឯកឧត្តមទេសរដ្ឋមន្រ្តី លី ធុជ បានថ្លែងថា គោលដៅកម្ពុជាគ្មានមីនឆ្នាំ២០២៥ គឺមានន័យថា កម្ពុជាមិនទុកប្រជាពលរដ្ឋខ្មែរណាម្នាក់ឱ្យបន្តរងគ្រោះថ្នាក់ដោយសារគ្រាប់មីនទៀតឡើយ ក្រោយឆ្នាំ ២០២៥។

​ឯកឧត្តមទេសរដ្ឋមន្រ្តី លី ធុជ បានបញ្ជាក់បែបនេះ ក្នុងឱកាសអនុញ្ញាតឱ្យលោក Carson Harte នាយកប្រតិបត្តិនៃមជ្ឈមណ្ឌលស្តារលទ្ធភាពពលកម្មកាយសម្បទាភ្នំពេញ (Exceed Worldwide) ចូលជួបសម្តែងការគួរសម និងពិភាក្សាការងារស្តីពីកិច្ចសង្រ្គោះជនរងគ្រោះថ្នាក់ដោយសារមីននាថ្ងៃទី ២៤ ខែតុលា ឆ្នាំ ២០២៣នេះ នៅទីស្នាក់ការអាជ្ញាធរមីន។ កិច្ចជំនួបនោះ ក៏មានការចូលរួមផងដែរពី លោក Marc Zlot នាយកអង្គការ ICRC និងលោក ទៀប ឧត្តម ប្រធានសមាគម KhAPO  នៅទីស្នាក់ ការអាជ្ញាធរមីន ព្រឹកថ្ងៃទី២៤ ខែតុលា ឆ្នាំ២០២៣ ។

លោក Carson Harte បានអបអរសាទរជូនចំពោះអាជ្ញាធរមីន ដែលបានទទួលជោគជ័យក្នុងការរៀបចំសន្និសីទសកលលើកទី៣ ស្តីពីកិច្ចសង្រ្គោះជនរងគ្រោះថ្នាក់ដោយសារមីន ថ្មីៗនេះ ដែលកម្ពុជាធ្វើជាម្ចាស់ផ្ទះ។ លោកថ្លែងថា មជ្ឈមណ្ឌលស្តារលទ្ធភាពពលកម្មកាយសម្បទាភ្នំពេញចង់ឃើញជនរងគ្រោះថ្នាក់ដោយសារមីនកម្ពុជា រួមទាំងក្រុមគ្រួសារ និងសហគមន៍ទទួលបានការយកចិត្តទុកដាក់កាន់ទែប្រសើរឡើង។

ឯកឧត្តម បណ្ឌិត លី ធុជ បានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះការចូលរួមរបស់ មជ្ឈមណ្ឌល Exceed Worldwide អង្គការ ICRC និងសមាគម KhAPO ដែលបានចូលរួមយ៉ាងសកម្មក្នុងកិច្ចគាំពារបីបាច់ថែទាំ និងការផ្តល់សេវាកម្មនានាដល់ជនមានពិការភាព ជាពិសេសជនរងគ្រោះថ្នាក់ដោយសារមីន និងសំណល់ជាតិផ្ទះពីសង្រ្គាម រួមទាំងការគាំទ្រសហគមន៍ឱ្យទទួលបាននូវឱកាសអប់រំ បណ្តុះបណ្តាលជំនាញវិជ្ជាជីវៈ ការងារ ឬការបង្កើតអាជីវកម្មថ្មីៗជាដើម។ 

ឯកឧត្តមថ្លែងថា រយៈពេលជាង ៣០ឆ្នាំនេះ កិច្ចការបោសសម្អាតមីននៅកម្ពុជា ត្រូវបានសហគមន៍អន្តរជាតិ និងដៃគូអភិវឌ្ឍន៍វាយតម្លៃខ្ពស់ និងទទួលបាននូវសមិទ្ធ ផលយ៉ាងធំធេងក្នុងការផ្តល់ដីសុវត្ថិភាពជូនប្រជាពលរដ្ឋ និងកាត់បន្ថយអត្រាគ្រោះថ្នាក់បានយ៉ាងច្រើនពីមួយឆ្នាំទៅមួយឆ្នាំ៕ អត្ថបទ ៖ ភារម្យ