ភ្នំពេញ ៖ នៅរសៀលថ្ងៃទី ២៤ ខែតុលា ឆ្នាំ២០២៣នេះ កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានទទួលជាលើកទី២ នូវទេយ្យទាន (សង្គហទាន) ជាគ្រឿងឧបភោគ-បរិភោគ សម្ភារប្រើប្រាស់ និងបច្ច័យ ដែលសរុបជាទឹកប្រាក់ចំនួន ៥៨លាន ៨សែន ៥ម៉ឺនរៀល ពីព្រះវិន័យវង្សា ស៊ា ប៊ុនណាត ព្រះរាជាគណៈកិត្តិយស និងជាព្រះចៅអធិការ វត្តមណិរតនារាម (ទួលទំពូង) ស្ថិតនៅសង្កាត់ទួលទំពូង១ ខណ្ឌចំការមន រាជធានីភ្នំពេញ។

ក្នុងឱកាសទទួលយកទេយ្យទាន លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី និងមន្ត្រីអនុសាខាកាកបាទក្រហមកម្ពុជា ខណ្ឌចំការមន ក្រុមកាកបាទក្រហមកម្ពុជាសង្កាត់ទាំង៦ នៃខណ្ឌចំការមន ព្រមទាំងពុទ្ធបរិស័ទ បានអញ្ជើញបូជាសក្ការៈថ្វាយចំពោះព្រះរតនត្រ័យ និងនមស្ការសង្ខេប ទៅតាមគន្លងប្រពៃណីព្រះពុទ្ធសាសនា។ បន្ទាប់ពីបានធ្វើបទនមស្ការសង្ខេបចប់សព្វគ្រប់ហើយ ព្រះវិន័យវង្សា ស៊ា ប៊ុនណាត បានមានថេរដិកាស្វាគមន៍ ចម្រើនពរ និងថ្លែងអំណរគុណយ៉ាងជ្រាលជ្រៅចំពោះ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានអនុញ្ញាតឱ្យព្រះសង្ឃ និងពុទ្ធបរិស័ទ បានចូលរួមចំណែកធ្វើសង្គហទានរួមគ្នាជាមួយ កាកបាទក្រហមកម្ពុជា ដែលជាស្ថាប័នមនុស្សធម៌ធំជាងគេ បំផុតនៅក្នុងព្រះរាជាណាចក្រកម្ពុជា ដើម្បីជួយសម្រាលការលំបាកដល់ប្រជាពលរដ្ឋដែលត្រូវការឱ្យជួយជាចាំបាច់។

លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានថ្លែងអំណរព្រះគុណ និងអរគុណ ចំពោះទឹកព្រះទ័យ និងទឹកចិត្តជ្រះថ្លារបស់ព្រះសង្ឃ គណៈកម្មការវត្ត និងពុទ្ធបរិស័ទចំណុះជើងវត្តទួលទំពូងទាំងអស់ ដែលបានចែករំលែកនូវទេយ្យទានទាំងអស់នេះ មកជូនកាកបាទក្រហមកម្ពុជា សម្រាប់បន្តចែកជូនដល់ប្រជាពលរដ្ឋរងគ្រោះ និងងាយរងគ្រោះបំផុត។ 

សូមបញ្ជាក់ថា ទេយ្យទាន ដែលព្រះចៅអធិការវត្តទួលទំពូង ជូនដល់ កាកបាទក្រហមកម្ពុជា ជាលើកទី២នេះ រួមមាន ៖ អង្ករ៣០បាវ, ទឹកក្រូច ៥០កេស, មី ៥០កេស, ទឹកបរិសុទ្ធ៥០កេស, ទឹកដោះគោ៥០០កំប៉ុង, តែ៥០០កញ្ចប់, ស្ករ៥០០គីឡូក្រាម,បន្លុង៨ឈុតនិងបច្ច័យសរុបចំនួន៣០លានរៀល ដោយគិតសរុបទាំងទេយ្យវត្ថុ និងបច្ចេយទាំងអស់ មានចំនួន ៥៨លាន ៨សែន ៥ម៉ឺនរៀល។

ដោយឡែកព្រះវិន័យវង្សា ស៊ា ប៊ុនណាត ព្រះរាជាគណៈកិត្តិយស និងជាព្រះចៅអធិការ វត្តមណិរតនារាម (ទួលទំពូង) ក៏បានប្រទានទេយ្យទានដល់អនុសាខាកាកបាទក្រហមកម្ពុជា ខណ្ឌចំការមន រួមមាន៖ អង្ករ ១០បាវ, ទឹកក្រូច ៣០កេស, មី៣០កេស, ទឹកបរិសុទ្ធ២០កេស, ទឹកដោះគោ ១០០កំប៉ុង, តែ៣០០កញ្ចប់, ស្ករ ២០០គីឡូក្រាម និងបច្ច័យ ៥លានរៀល។ ប្រទានដល់ក្រុមកាកបាទក្រហមសង្កាត់ទាំង៦ នៃខណ្ឌចំការមន ដោយក្រុមនីមួយៗទទួលបាន៖ អង្ករ៥បាវ, ទឹកក្រូច ២០កេស, មី១០កេស, ទឹកបរិសុទ្ធ១០កេស, ទឹកដោះគោ៧៥កំប៉ុង, តែ១០០កញ្ចប់, ស្ករ១០០គីឡូក្រាម និងបច្ច័យ ២លាន៥សែនរៀល៕ អត្ថបទ៖ សំ ងីម