វីដេអូពីសាក្សីដែលថតបាន បង្ហាញពីរថយន្តគិលានសង្គ្រោះមួយគ្រឿង បាន​មក​ដល់​មន្ទីរ​ពេទ្យ​ឥណ្ឌូនេស៊ី ក្នុងទីក្រុង Beit Lahiya ក្នុងភាពងងឹត ដោយ​បុគ្គលិក​បើក​ភ្លើង​បំភ្លឺ​ផ្លូវ​ដោយ​ភ្លើង​ទូរស័ព្ទដៃ។

មន្ទីរពេទ្យជាច្រើនកន្លែង នៅក្នុងតំបន់ហ្កាហ្សា ជិតអស់​ប្រេង​ឥន្ធនៈ ដើម្បី​ផ្តល់​ថាមពល​ដល់​ម៉ាស៊ីន​ភ្លើង ដែលក្រុមវេជ្ជបណ្ឌិតបានព្រមានថា បរិក្ខាសំខាន់ៗ​ដូច​ជា​កែវ​ក្រុង​ទារ​ក​សម្រាប់​ទារក​ទើប​កើត មានហានិភ័យលែងដំណើរការ។

ក្រសួងសុខាភិបាល ដែលដំណើរការដោយក្រុមហាម៉ាស់ បាននិយាយ​ថា​ មជ្ឈ​មណ្ឌល​វេជ្ជសាស្ត្រ​ចំនួន​ ៤០​កន្លែង បានផ្អាកប្រតិបត្តិការ នៅពេលមួយដែល​ការ​ទម្លាក់​គ្រាប់​បែក​និង​ការ​ជម្លៀស​ខ្លួន​កំពុង​ធ្វើ​ឲ្យមានភាពតានតឹងខ្លាំងលើប្រព័ន្ធនេះ។ 

មន្ទីរពេទ្យឯកជនឥណ្ឌូនេស៊ី ជាមន្ទីរពេទ្យធំបំផុតមួយនៅក្នុងតំបន់ហ្កាហ្សាភាគខាងជើង បាន​និយាយ​ថា មន្ទីរពេទ្យបានបិទគ្រប់ផ្នែកទាំងអស់ លើកលែងតែផ្នែកសំខាន់ចុងក្រោយដូចជា ផ្នែក​សង្គ្រោះបន្ទាន់។

វេជ្ជបណ្ឌិតប៉ាឡេស្ទីនកាត់អង់គ្លេស លោក Ghassan Abu Sittah និយាយ​នៅ​ក្នុង​វីដេអូ​មួយ​ដែល​បាន​ចេញផ្សាយកាលពីថ្ងៃចន្ទថា មន្ទីពេទ្យ Al-Shifa នៅក្នុងទីក្រុងតំបន់ហ្កហ្សា ជា​កន្លែង​ដែល​លោក​បម្រើការងារ បានទទួលអ្នករងរបួសជាង៤០០នាក់ ក្នុងរយៈពេល២៤ម៉ោង បន្ទាប់​ពី​ការ​វាយ​ប្រហារ ក្នុងតំបន់ជិតមន្ទីរពេទ្យនេះ។