អ៊ីស្លង់ ៖ ស្ត្រីជនជាតិអ៊ីស្លង់ជាច្រើននាក់ បានធ្វើកូដកម្មរយៈពេល ២៤ម៉ោងកាលពីថ្ងៃអង្គារ (២៤ តុលា) ជុំវិញបញ្ហា វិសមភាពយេនឌ័រ រួមទាំងនាយករដ្ឋមន្រ្តីរបស់ប្រទេសនេះ គឺលោកស្រី Katrin Jakobsdottir ដែលបាននិយាយថា ការប្រយុទ្ធដើម្បីភាពស្មើគ្នាកំពុងដំណើរការក្នុងល្បឿងដ៏យឺតយ៉ាវនៅក្នុងប្រទេស និងក្រៅប្រទេស។

នៅទូទាំងប្រទេសកោះដ៏តូចមួយនេះ សាលារៀន និងបណ្ណាល័យជាច្រើនត្រូវបានបិទ ឬដំណើរការក្នុងម៉ោងកំណត់ ដោយសារបុគ្គលិកដែលជាស្រ្តីមិនបានទៅធ្វើការ។ ក្នុងពេលជាមួយគ្នានោះ មន្ទីរពេទ្យជាច្រើនបាននិយាយថា ពួកគេនឹងដោះស្រាយតែករណីសង្គ្រោះបន្ទាន់ប៉ុណ្ណោះ ហើយមនុស្សរាប់ពាន់នាក់បានចូលរួមក្នុងការប្រមូលផ្តុំគ្នានៅក្នុងរដ្ឋធានី។

ក្រុមរៀបចំការតវ៉ាបាននិយាយថា កូដកម្មនេះត្រូវបានធ្វើឡើង ដើម្បីតវ៉ាប្រឆាំងនឹងគម្លាតនៃប្រាក់ឈ្នួលរបស់ស្រ្តី បើប្រៀបធៀបទៅនឹងបុរស ប្រឆាំងនឹងអំពើហិង្សាផ្អែកលើយេនឌ័រ និងដើម្បីបង្ហាញពីការងារដែលមិនទទួលបានប្រាក់ខែ ដូចជាការថែទាំកុមារ ដែលភាគច្រើនកើតមានលើស្ត្រី។ 

សូមបញ្ជាក់ថា ប្រទេសអ៊ីស្លង់ ត្រូវបានចាត់ទុកថាជាប្រទេសរីកចម្រើនបំផុតមួយរបស់ពិភពលោក ទាក់ទងនឹងសមភាពយេនឌ័រ ហើយបានឈរនៅកំពូលតារាងនៃសន្ទស្សន៍គម្លាតយេនឌ័រ របស់វេទិកាសេដ្ឋកិច្ចពិភពលោក រយៈពេល១៤ឆ្នាំ ជាប់ៗគ្នាផងដែរ៕