ក្នុងការអធិប្បាយដ៏ខ្លាំងបំផុតរបស់ខ្លួនស្តីពីជម្លោះតំបន់ហ្គាហ្សា ប្រធានាធិបតីទួរគី លោក តាយីប អេរដូហ្គែន (Tayyip Erdogan) បាននិយាយកាលពីថ្ងៃពុធថា ក្រុម​សកម្ម​ប្រយុទ្ធ​ប៉ាឡេស្ទីន​ហាម៉ាស មិនមែនជាអង្គការភេរវកម្មទេ ប៉ុន្តែជាក្រុមរំដោះដែលកំពុងប្រយុទ្ធ ដើម្បី​ការពារ​ទឹកដី​ប៉ាឡេស្ទីន។

សមាជិកអង្គការណាតូ ប្រទេសទួរគី បានថ្កោលទោសការស្លាប់ជនស៊ីវិល ដែល​បណ្តាល​មក​ពី​ការ​វាយ​លុក​កាលពីថ្ងៃទី៧ ខែតុលា របស់ក្រុមហាម៉ាស នៅភាគខាងត្បូងប្រទេសអ៊ីស្រាអែល ប៉ុន្តែ​ថែម​ទាំងបានជំរុញឲ្យកងកម្លាំងអ៊ីស្រាអែល ធ្វើសកម្មភាពដោយអត់ធ្មត់ ក្នុងការឆ្លើយ​តប​របស់​ពួក​គេ​។ ទីក្រុងអង់ការ៉ា បានរិះគន់យ៉ាងខ្លាំងចំពោះការទម្លាក់គ្រាប់បែករបស់អ៊ីស្រាអែល ទៅលើ​តំបន់​ហ្គាហ្សា។

លោកបានថ្លែងប្រាប់សមាជិកសភាមកពីគណបក្ស AK ដែលកាន់អំណាចរបស់ខ្លួនថា «ក្រុម​ហាម៉ាស មិនមែនជាអង្គការភេរវកម្មទេ វាគឺជាក្រុមរំដោះ «មូចាហ៊ីឌីន​[mujahideen]» ដែល​ប្រយុទ្ធ ដើម្បីការពារទឹកដី និងប្រជាជនរបស់ខ្លួនប៉ុណ្ណោះ ដោយប្រើ​ភាសាអា​រ៉ាប់​ដែល​បង្ហាញ​ពី​អ្នក​ដែល​ប្រយុទ្ធ ដើម្បីសាសនារបស់ពួកគេ។

មិនដូចសម្ព័ន្ធមិត្តណាតូជាច្រើនរបស់ខ្លួន និងសហភាពអឺរ៉ុបទេ ប្រទេសទួរគី មិនចាត់ទុក​ក្រុមហាម៉ាស​ជា​អង្គការភេរវកម្ម និងមិនផ្តល់ទីតាំងដល់សមាជិកនៃក្រុមនេះ នៅលើទឹកដី​របស់​ខ្លួន​ទេ​។ ទីក្រុងអង់ការ៉ា គាំទ្រដំណោះស្រាយរដ្ឋពីរចំពោះជម្លោះអ៊ីស្រាអែល-ប៉ាឡេស្ទីន ដែល​មាន​អាយុកាលរាប់ទសវត្សរ៍ហើយនោះ៕