ភ្នំពេញ៖ «ផ្តើមពីយុទ្ធនាការសាមញ្ញ តែមានភាពយូរអង្វែងឆ្ពោះទៅភាពស្អាត បៃតង និងចីរភាព ចាំបាច់ត្រូវមានការចូលរួមយ៉ាងសកម្មពីគ្រប់ភាគីពាក់ព័ន្ធ»។ នេះជាថ្លែងឡើងរបស់ឯកឧត្តមបណ្ឌិត អ៊ាង សុផល្លែតរដ្ឋមន្រ្តីក្រសួងបរិស្ថាន ក្នុងកម្មវិធីលើកទឹកចិត្តប្រតិបត្តិមេត្រីបរិស្ថាន និងពិធីប្រគល់ជ័យលាភីប្រឡងប្រណាំង « ភូមិ ឃុំ-សង្កាត់មានសុវត្ថិភាព» ក្នុងក្របខ័ណ្ឌលក្ខណៈសម្បត្ដិទី៦ ឆ្នាំ២០២៣ នាល្ងាចថ្ងៃទី២៦ខែតុលានេះ ស្ថិតនៅទីស្តីការក្រសួងបរិស្ថាន។

ឯកឧត្តមរដ្ឋមន្រ្តីបានថ្លែងបន្តថា ចលនាប្រឡងប្រណាំង «ភូមិ ឃុំ-សង្កាត់មានសុវត្ថិភាព» ក្នុងក្របខណ្ឌលក្ខណសម្បត្តិទី៦ ជាផ្នែកមួយនៃការអភិវឌ្ឍខ្សែក្រវ៉ាត់បៃតង (Green Belt) នៅកម្ពុជា ធ្វើឱ្យទីក្រុង ទីប្រជុំជនក្នុងប្រទេសយើងកាន់តែស្រស់ ស្អាត ប្រកបដោយភាពទាក់ទាញ។

លើសពីនេះ ឯកឧត្តមរដ្ឋមន្រ្តី បន្តលើកទឹកចិត្តដល់ផ្នែកមេត្រីបរិស្ថានសម្រាប់ក្រសួង ស្ថាប័នពាក់ព័ន្ធ អាជ្ញាធរថ្នាក់ក្រោមជាតិ ដៃគូអភិវឌ្ឍន៍ អង្គការសង្គមស៊ីវិល វិស័យសាធារណៈ វិស័យឯកជន (រួមមានសហ គ្រាសធុនតូច និងមធ្យម) សហគមន៍មូលដ្ឋាន និងប្រជាពលរដ្ឋ ចូលរួមការកែលម្អបរិស្ថាន តាមរយៈលំនៅដ្ឋានស្អាត ស្ថាប័នស្អាត កន្លែងធ្វើការស្អាត វត្តអារ៉ាមស្អាត ភោជនីយដ្ឋានស្អាត រមណីយដ្ឋានស្អាត រោងចក្រស្អាត ដោយផ្តើមចេញពីខ្លួនយើង គ្រួសារយើង សហគមន៍យើង និង ស្ថាប័នយើង ឱ្យមានភាពសុខដុម និងផាសុកភាពក្នុងការរស់នៅប្រកបដោយភាពស្អាត ភាពបៃតង ក្នុងសង្គមរបស់ខ្លួន។

គួរបញ្ជាក់ដែរថា កម្មវិធីលើកទឹកចិត្តប្រតិបត្តិមេត្រីបរិស្ថាន និងពិធីប្រគល់ជ័យលាភីប្រឡង ប្រណាំង « ភូមិ ឃុំ-សង្កាត់មានសុវត្ថិភាព» ក្នុងក្របខ័ណ្ឌលក្ខណៈសម្បត្ដិទី៦ ឆ្នាំ២០២៣ ធ្វើឡើងក្នុងគោលបំណងដូចជា៖ លើកទឹកចិត្តដល់ប្រតិបត្តិករ និងអាជ្ញាធរឃុំ-សង្កាត់ ដែលបានចូលរួមអនុវត្តសកម្មភាពមេត្រីបរិស្ថាន,ចែករំលែកបទពិសោធន៍ការចូលរួមប្រតិបត្តិមេត្រីបរិស្ថានរបស់ប្រតិបត្តិករគំរូ និងអាជ្ញាធរឃុំ-សង្កាត់ឆ្នើម ដល់រូបវន្តបុគ្គល និងនីតិបុគ្គលផ្សេងៗទៀត ឱ្យបានយល់ដឹងកាន់តែច្បាស់ពីសារៈសំខាន់ដែលបានចូលរួមប្រតិបត្តិមេត្រីបរិស្ថាន និង ផ្សព្វផ្សាយឱ្យកាន់តែទូលំទូលាយពីសកម្មភាពប្រតិបត្តិមេត្រីបរិស្ថានរបស់ប្រតិបត្តិករគំរូ និង អាជ្ញាធរឃុំ-សង្កាត់ឆ្នើមប្រចាំឆ្នាំទៅដល់សាធារណជនដ៏ទៃទៀត ឱ្យចូលរួមប្រតិបត្តិមេត្រីកាន់តែសកម្ម។អត្ថបទ៖ទូច សោភ័ណ