ធនាគារកណ្តាលរបស់ប្រទេសចិនបាននិយាយនៅថ្ងៃសុក្រ (២៧ តុលា) នេះថា ក្រុមការងារហិរញ្ញវត្ថុចិន-អាមេរិក បានរៀបចំកិច្ចប្រជុំលើកដំបូងរបស់ខ្លួនតាមរយៈតំណភ្ជាប់វីដេអូកាលពីថ្ងៃពុធ (២៥ តុលា) ហើយបានយល់ព្រមរក្សាទំនាក់ទំនងជាមួយគ្នា។

សេចក្តីថ្លែងការណ៍របស់ធនាគារប្រជាជនចិន (PBOC) បានឲ្យដឹងថា ភាគីទាំងពីរ មានការប្រាស្រ័យទាក់ទងប្រកបដោយវិជ្ជាជីវៈ ជាក់ស្តែង ច្បាស់លាស់ និងស្ថាបនា លើស្ថិរភាពរូបិយវត្ថុ និងហិរញ្ញវត្ថុ បទប្បញ្ញត្តិហិរញ្ញវត្ថុ ហិរញ្ញវត្ថុប្រកបដោយនិរន្តរភាព ការប្រឆាំងនឹងការលាងសម្អាតប្រាក់ និងការប្រឆាំងការផ្តល់ហិរញ្ញប្បទានភេរវកម្ម អភិបាលកិច្ចហិរញ្ញវត្ថុសកល ព្រមទាំងបញ្ហាសំខាន់ៗផ្សេងទៀត ដែលជាកង្វល់រួមរបស់ប្រទេសទាំងពីរ។

កិច្ចប្រជុំនេះ បានធ្វើឡើងតាមរយៈការយល់ដឹងរួមសំខាន់ៗ ដែលសម្រេចបានរវាងប្រធានាធិបតីនៃប្រទេសទាំងពីរ នៅក្នុងកិច្ចប្រជុំរបស់ពួកគេនៅកោះបាលី និងការឯកភាពដែលសម្រេចបាន ដោយលោក He Lifeng ដែលជាឧបនាយករដ្ឋមន្ត្រីចិន និងជាអ្នកដឹកនាំជនជាតិចិនសម្រាប់កិច្ចការសេដ្ឋកិច្ចរវាងប្រទេសចិន-សហរដ្ឋអាមេរិក និងពាណិជ្ជកម្ម ជាមួយរដ្ឋលេខាធិការក្រសួងរតនាគារ សហរដ្ឋអាមេរិក លោកស្រី Janet Yellen។

ក្រុមមន្ត្រីអនុក្រសួងមកពីធនាគារប្រជាជនចិន PBOC និងក្រសួងរតនាគាររបស់សហរដ្ឋអាមេរិក បានធ្វើជាសហប្រធានកិច្ចប្រជុំកាលពីថ្ងៃពុធនោះ ដោយមានការចូលរួមពីក្រុមមន្ត្រីចិន ក៏ដូចជាក្រុមមន្ត្រីសហរដ្ឋអាមេរិកផងដែរ៕