មេដឹកនាំសហភាពអឺរ៉ុប កាលពីថ្ងៃព្រហស្បតិ៍ (ទី២៦ ខែតុលា) បានអំពាវនាវឲ្យមានការផ្អាកនូវការទម្លាក់គ្រាប់បែករបស់ប្រទេសអ៊ីស្រាអែល និងការវាយប្រហារដោយគ្រាប់រ៉ុក្កែតពីសំណាក់ក្រុមហាម៉ាស ដើម្បីអនុញ្ញាតឲ្យជំនួយមនុស្សធម៌បានចូលទៅកាន់តំបន់ហ្គាហ្សា បន្ទាប់ពីមានជម្លោះជាច្រើនថ្ងៃ ដែលបង្ហាញពីការបែកបាក់កាន់តែរាលដាលឡើង នៅក្នុងប្លុក ជុំវិញជម្លោះអ៊ីស្រាអែល និងប៉ាឡេស្ទីន។

នៅក្នុងសេចក្តីប្រកាសមួយដែលបានព្រមព្រៀងគ្នា នៅឯកិច្ចប្រជុំកំពូល នាទីក្រុងប្រ៊ុចសែល ប្រទេសបែលហ្ស៊ិក បណ្ដាមេដឹកនាំនៃប្រទេសទាំង២៧ របស់សហភាពនេះ បានសម្តែងនូវ «ការព្រួយបារម្ភយ៉ាងខ្លាំងចំពោះស្ថានភាពមនុស្សធម៌ ដែលកាន់តែមានសភាពយ៉ាប់យ៉ឺនទៅៗ នៅតំបន់ហ្គាហ្សានេះ»។

មេដឹកនាំទាំងនោះ បានអំពាវនាវឲ្យមាន «ការចូល និងជំនួយមនុស្សធម៌ជាបន្ត រហ័ស សុវត្ថិភាព និងគ្មានការរារាំង ដើម្បីឲ្យបានទៅដល់អ្នកដែលត្រូវការ តាមរយៈវិធានការចាំបាច់ទាំងអស់ ក្នុងនោះរួមទាំងការមានច្រករបៀងមនុស្សធម៌ និងការផ្អាកប្រយុទ្ធ សម្រាប់តម្រូវការមនុស្សធម៌» ផងដែរ។

កិច្ចប្រជុំកំពូលនេះ គឺជាជំនួបផ្ទាល់លើកដំបូងរបស់បណ្ដាមេដឹកនាំទាំងនេះ គិតចាប់តាំងពីមានការវាយប្រហារបង្ហូរឈាម កាលពីថ្ងៃទី៧ ខែតុលា មកលើអ៊ីស្រាអែលដោយក្រុមសកម្មប្រយុទ្ធហាម៉ាសប៉ាឡេស្ទីន ដែលបន្ទាប់មក បានជំរុញឲ្យអ៊ីស្រាអែលធ្វើការសងសឹក ដោយការទម្លាក់គ្រាប់បែក និងបិទផ្លូវចេញចូលរបស់ក្រុមហាម៉ាស ដែលគ្រប់គ្រងតំបន់ហ្គាហ្សា៕