ឥណ្ឌា៖ រដ្ឋធានីញូវ ដែល្លី និងទីក្រុងហិរញ្ញវត្ថុម៉ុមបៃ របស់ប្រទេសឥណ្ឌា បានចាប់ផ្តើមបញ្ឈប់វិធានការរឹតត្បិតបន្តិចម្តងៗនៅថ្ងៃចន្ទ ស្របពេលដែលករណីឆ្លងនៅក្នុងប្រទេសមួយនេះ បានធ្លាក់ចុះទាបក្នុងរយៈពេល២ខែ។
នៅថ្ងៃចន្ទនេះ ឥណ្ឌារាយការណ៍ករណីឆ្លងថ្មីជំងឺ COVID-19ចំនួន ១០០.៦៣៦នាក់ ក្រោយរកឃើញករណីឆ្លងថ្មីច្រើនជាង ៤០ម៉ឺននាក់ អស់រយៈពេលជាច្រើនថ្ងៃ អំឡុងខែឧសភា និងករណីស្លាប់ ២.៤២៧នាក់។
មន្ទីរពេទ្យនៅក្នុងទីក្រុងធំទាំង២ ដែលមានពលរដ្ឋសរុបប្រហែល ៤០លាននាក់ បានដាក់អ្នកជំងឺលើសចំណុះ ដោយសារតែរលកនៃករណីឆ្លងជំងឺ COVID-19 ក្នុងខែមេសា និងខែឧសភា ធ្វើឲ្យពួកគេ ជួបកង្វះខាតអុកស៊ីហ្សែនធ្ងន់ធ្ងរ និងឱសថសំខាន់ផ្សេងៗទៀត។
ការហក់ឡើងករណីឆ្លងថ្មីដ៏ច្រើនលើសលប់នេះដែរ ធ្វើឲ្យឥណ្ឌារាយការណ៍ករណីឆ្លងថ្មី និងស្លាប់ថ្មីច្រើនជាងគេបំផុត និងធ្វើឲ្យពួកគេ ក្លាយជាប្រទេសរងផលប៉ះពាល់ខ្លាំងបំផុតលំដាប់ទី២នៅលើពិភពលោក បន្ទាប់ពីសហរដ្ឋអាមេរិកជាមួយនឹងករណីឆ្លងជិត ២៩លាននាក់។
កាលពីពេលកន្លងទៅ ក្រុមអាជ្ញាធរនៅក្នុងទីក្រុងដែល្លី និងទីក្រុងម៉ុមបៃ ក៏ដូចជាទីក្រុងជាច្រើនទៀត បានដាក់ចេញវិធានការរឹតត្បឹតលើការធ្វើដំណើរ និងសកម្មភាពនានា ដើម្បីប្រយុទ្ធប្រឆាំងនឹងការហក់ឡើងខ្ពស់ករណីឆ្លងជំងឺ COVID-19។
លោកអាវីន ខេរីវ៉ាល់ គឺជានាយកមន្ត្រីក្រុងដែល្លី បាននិយាយនៅលើ Twitterថា ពួកយើងត្រូវតែសុវត្ថិភាពពីជំងឺ COVID-19 ហើយពួកយើងត្រូវតែធ្វើឲ្យសេដ្ឋកិច្ចដើរផងដែរ ស្របពេលដែលផ្សារទំនើបមួយចំនួន ចាប់បើកដំណើរការឡើងវិញ។
លោកបានបញ្ជាឲ្យពាក់កណ្តាលនៃផ្សារលក់ទំនិញនៅក្នុងរដ្ឋធានីដែល្លី បើកឡើងវិញ ហើយចំនួនផ្សារជាច្រើនទៀត នឹងបើកដំណើរការជាបន្តបន្ទាប់ ប៉ុន្តែការិយាល័យ និងបណ្តាញផ្លូវរថភ្លើងក្រោមដីក្រុងដែល្លី បើកតែ ៥០ភាគរយប៉ុណ្ណោះ។
ទោះបីជាយ៉ាងណាក៏ដោយ វិធានការផ្សេងទៀត នៅតែអនុវត្តន៍ដដែល ដូចជាបម្រាមការទទួលទានអាហារពេលល្ងាចនៅតាមភោជនីយដ្ឋាន នៅរោងមហោស្រព និងកីឡដ្ឋាន៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
