នៅថ្ងៃចន្ទនេះ យោធាអ៊ីស្រាអែល បានបញ្ចេញរូបភាពវីដេអូឃ្លីបដែលពួកគេអះអាងថា ពួកគេបានវាយប្រហារលើហេដ្ឋារចនាសម្ព័ន្ធយោធានៅក្នុងប្រទេសស៊ីរី ។

អ៊ីស្រាអែលអះអាងថា ពួកគេបានឆ្លើយតបនឹងការវាយប្រហារចេញពីស៊ីរី ទៅលើដែនដីអ៊ីស្រាអែលកាលពីព្រឹកថ្ងៃអាទិត្យម្សិលមិញ ។

ក្តីកង្វល់ពីហានិភ័យលើជម្លោះទ្រង់ទ្រាយធំនៅតំបន់មជ្ឈិមបូព៌ា បានកើនឡើង ក្នុងរយៈពេលប៉ុន្មានថ្ងៃចុងក្រោយនេះ ក្នុងនោះសហរដ្ឋអាមេរិក បានបញ្ជូនគ្រឿងយុទ្ធោបករណ៍កាន់តែច្រើនចូលទៅក្នុងតំបន់ ស្របពេលដែលអ៊ីស្រាអែល បង្កើនការវាយប្រហារលើគោលដៅរបស់ខ្លួននៅក្នុងតំបន់ហ្គាហ្សាស្រ្ទីប ហើយនិងក្រុមគាំទ្រជីវពលហាម៉ាស់ នៅស៊ីរី និងនៅលីបង់ ។

ខណៈពេលនោះដែរ ប្រជាជនប៉ាឡេស្ទីន នៅភាគខាងជើងតំបន់ហ្កាហ្សា បានរាយការណ៍ពីការវាយប្រហារតាមច្រកអាកាស និងកាំភ្លើងធំយ៉ាងខ្លាំងក្លានៅព្រឹកថ្ងៃចន្ទនេះ ខណៈទាហានអ៊ីស្រាអែល ដែលគាំទ្រដោយរថក្រោះ បានសម្រុកចូលទៅក្នុងតំបន់ឡោមព័ទ្ធមួយនេះ ជាមួយនឹងការវាយលុកថ្មើរជើង ដែលបានធ្វើឲ្យកើតមានការអំពាវនាវអន្តរជាតិកាន់តែខ្លាំងឡើងសម្រាប់ការការពារជនស៊ីវិល ៕