និស្សិតជំនាញកសិកម្មមកពីបណ្ដាសាកលវិទ្យាល័យនានា នៅរាជធានីភ្នំពេញជិត ៥០នាក់ បាន​មក​ធ្វើទ​ស្សនកិច្ចសិក្សានៅ Angkor Wildlife & Aquarium អំពីចលនា និងការបម្លាស់ទីរបស់ត្រី ពិសេសត្រី​ទឹកសាបនៅកម្ពុជា។ ជាមួយគ្នានេះក្រុមនិស្សិតក៏បានស្វែងយល់ពី ជណ្តើរត្រី ដែល​ទើប​ស្ថាបនា​រួចរាល់ស្ថិតនៅភូមិស្លែង ក្នុងស្រុកក្រឡាញ់ ខេត្តសៀមរាប។

ទស្សនកិច្ចសិក្សានេះ ដឹកនាំដោយក្រុមការងារមជ្ឈមណ្ឌល​អូស្ត្រាលី​សម្រាប់​ការ​ស្រាវ​ជ្រាវ​កសិកម្ម​អន្តរជាតិ (ACIAR) និងមានការចូលរួមជាមួយតំណាងមកពីក្រសួងកសិកម្ម រុក្ខាប្រមាញ់ និង​នេសាទ រដ្ឋបាលជលផល។

ក្រុមនិស្សិតមកពីបណ្ដាសាកលវិទ្យាល័យនានាបានបង្ហាញក្ដីរីករាយដែលទទួលបានបទពិសោធថ្មីៗ​បន្ថែមទៀតពីក្រុមអ្នកជំនាញ និងបានមើលឃើញទិដ្ឋភាពការធ្វើចលនា និងបម្លាស់ទី​របស់​ត្រី​ដោយ​ផ្ទាល់​នៅទីនេះ។

ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធាន​ក្រុម​ការងារ​ជណ្ដើរ​ត្រីបា​នបង្ហាញការគាំទ្រ ចំពោះគម្រោងការសាងសង់ជណ្ដើរត្រីនេះ និង​បាន​ប្ដេជ្ញា​ចិត្ត​ចូលរួមសហការក្នុងការអនុវត្តគម្រោងនេះនៅពេលបន្តបន្ទាប់ខាងមុខទៀត។

សូមជម្រាបថា រដ្ឋាភិបាលអូស្ត្រាលីបានចូលរួមជាមួយតំណាងមកពីក្រសួងកសិកម្ម រុក្ខាប្រមាញ់ និង​នេសាទ រដ្ឋបាលជលផល អាជ្ញាធរមូលដ្ឋាន និងប្រជាជន នៅថ្ងៃទី១ ខែវិច្ឆិកា ឆ្នាំ ២០២៣ ខាង​មុខនេះ នឹងធ្វើការសម្ពោធជណ្តើរត្រី ដែលទើបសាងសង់រួចរាល់ ស្ថិតនៅ ភូមិស្លែង ក្នុង​ស្រុក​ក្រឡាញ់ ខេត្តសៀមរាប។

ជណ្តើរត្រី​ភូមិស្លែងនេះ ជួយស្តារការផ្លាស់ទីរបស់ត្រី និងតភ្ជាប់ឡើងវិញនូវផ្លូវទឹកដែលល្អ រវាង​បឹង​ទន្លេ​សាប និងសហគមន៍មូលដ្ឋាននៅតាមដងទន្លេ និងផ្លូវនេសាទ ដែលផ្តល់​អត្ថ​ប្រយោជន៍​ដល់​ពួក​គេទាំង​ផ្នែក​សង្គម និងសេដ្ឋកិច្ច។ ជណ្តើរត្រីនេះផងដែរ នឹងជួយ​កាត់​បន្ថយ​ផល​ប៉ះពាល់​បណ្តាល​មក​ពីការអភិវឌ្ឍប្រព័ន្ធធារាសាស្រ្ត ដូចជានិយតករ ទំនប់ទឹក ទៅលើការផ្លាស់​ទី​របស់​ត្រី​៕ អត្ថបទ៖ វ៉ន ដារ៉ា