ប្រធានាធិបតីកូរ៉េខាងត្បូងលោក Yoon Suk Yeol នៅថ្ងៃអង្គារ (ទី៣១ ខែតុលា) បាននិយាយថា កំណើនសេដ្ឋកិច្ចនៅឆ្នាំ២០២៤ នឹងឡើងលើសពីអត្រាកំណើន ដែលនឹកស្មានមិនដល់ បន្ទាប់ពីកើនឡើងក្នុងល្បឿនដ៏លឿន នៅឆមាសទី២ នៃឆ្នាំ២០២៣ ហើយបានសន្យាឲ្យមានទំនាក់ទំនងកាន់តែជិតស្និទ្ធជាមួយសហរដ្ឋអាមេរិក ក្នុងការពង្រឹងសមត្ថភាពគ្រប់គ្រងវិបត្តិ។

នៅក្នុងសុន្ទរកថាទៅកាន់សភា ដែលគាំទ្រដល់សំណើសុំថវិកាសម្រាប់ជាតិ នាឆ្នាំក្រោយ លោក Yoon បាននិយាយថា រដ្ឋាភិបាលកំពុងតាមដានយ៉ាងយកចិត្តទុកដាក់នូវស្ថានភាពសេដ្ឋកិច្ច និងសន្តិសុខ ហើយត្រៀមខ្លួនចាត់វិធានការឆ្លើយតបឲ្យទាន់ពេលវេលា។

លោក Yoon ក៏បានលើកឡើងពីអាទិភាពរបស់រដ្ឋាភិបាលរបស់លោកលើការរក្សាទំនាក់ទំនងសន្តិសុខជាមួយសហរដ្ឋអាមេរិក និងសម្ព័ន្ធមិត្តផ្សេងទៀត ហើយបានប្រាប់ថា កិច្ចសហប្រតិបត្តិការសន្តិសុខសេដ្ឋកិច្ចជាមួយទីក្រុងវ៉ាស៊ីនតោន អាចពង្រឹងសមត្ថភាពគ្រប់គ្រងវិបត្តិរបស់ប្រទេសបាន។

ហើយជាមួយគ្នានេះ លោក Yoon បានបន្ថែមថា កូរ៉េខាងត្បូងក៏នឹងរក្សាផងដែរនូវកិច្ចសហប្រតិបត្តិការ ដែលមានផលប្រយោជន៍ទៅវិញទៅមកជាមួយប្រទេសចិន ដែលជាដៃគូពាណិជ្ជកម្មដ៏ធំបំផុតរបស់កូរ៉េខាងត្បូង៕