បន្ទាយមានជ័យ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅព្រឹកថ្ងៃទី០១ខែវិច្ឆិកាឆ្នាំ២០២៣ បានអញ្ជើញចុះពិនិត្យមើលពីវឌ្ឍនភាពច្រកអន្តរជាតិស្ទឹងបត់ ពីស្ថានភាពនៃការផ្តល់សេវាដឹកជញ្ជូន ត្រួតពិនិត្យ ស្ថានភាពជាក់ស្តែង នៅតាមបន្ទាត់ព្រំដែន និងច្រកទ្វាអន្តរជាតិប៉ោយប៉ែត ព្រមទាំងជួបសំណេះសំណាលជាមួយមន្ត្រីនគរបាល ប្រចាំច្រកទ្វាអន្តរជាតិប៉ោប៉ែត។

នៅក្នុងឱកាសនោះដែរឯកឧត្ដមអភិសន្តិបណ្ឌិត ស សុខា ​ក៏​បានថ្លែង​នូវ​ការកោត​សរសើរ​ចំពោះថ្នាក់​ដឹកនាំ​ខេត្តបន្ទាយមានជ័យ គ្រប់ផ្នែក​ពាក់ព័ន្ធទាំងអស់ ​ជាពិសេសកង​កម្លាំង​ឈរជើង​នៅតាមបន្ទាត់ព្រំដែន ​ដែលបានអនុវត្តតួនាទីភារកិច្ចរបស់ខ្លួន បានយ៉ាងល្អប្រសើរ។

ជាមួយគ្នានោះដោយសារតែខេត្តបន្ទាយមានជ័យជាខេត្តជាប់ព្រំដែនកម្ពុជា-ថៃឯកឧត្ដម អភិសន្តិបណ្ឌិត ស សុខា ក៏បានធ្វើការណែនាំដល់គ្រប់អ្នកពាក់ព័ន្ធជាពិសេសសមត្ថកិច្ច​ឈរជើង​តាម​បន្ទាត់ព្រំដែន ត្រូវធ្វើការ​រឹតបន្តឹង​ការពារ​សន្តិសុខ​តាមបណ្តោយព្រំដែនឱ្យបានល្អ ទប់ស្កាត់​នូវបទល្មើសផ្សេងៗ ​ដូចជា​ការ​លួចឆ្លងដែនខុសច្បាប់​ពីសំណាក់បងប្អូនពលករកម្ពុជា​ទៅ​ធ្វើការនៅប្រទេសថៃ ​ការរត់ពន្ធទំនិញឆ្លងដែនខុសច្បាប់ ជាពិសេសគឺការរត់ពន្ធគ្រឿងញៀន​នៅ​តាមបន្ទាត់ព្រំដែន ដែលចំណុចនេះ​ទាមទារ​ឱ្យមានកិច្ចសហការគ្នារវាងអាជ្ញាធរ​សមត្ថកិច្ច ពាក់ព័ន្ធ​គ្រប់ជាន់ថ្នាក់ ​បង្កើនកិច្ចសហប្រតិបត្តិការ ​ក្នុងនាមប្រទេសជិតខាងល្អ ជាមួយភាគីថៃ សំដៅធ្វើយ៉ាង​ណា​ទប់ស្កាត់​កុំឲ្យបទល្មើស​កើតមាននៅតាមព្រំដែន៕