ប៉ាឡេស្ទីន ៖ ក្រុមពលរដ្ឋមូស្លីម និងអារ៉ាប់មួយចំនួន ដែលមានសញ្ជាតិអាមេរិក កំពុងគំរាមកំហែងដកការបរិច្ចាគ និងមិនបោះឆ្នោតឲ្យលោកប្រធានាធិបតីអាមេរិក Joe Biden នៅក្នុងការបោះឆ្នោតឆ្នាំ២០២៤ នោះទេ លុះត្រាតែលោកចាត់វិធានការភ្លាមៗដើម្បីទទួលបានបទឈប់បាញ់នៅតំបន់ហ្កាហ្សា។

ក្រុមប្រឹក្សាជាតិប្រជាធិបតេយ្យមូស្លីម ដែលរួមមានបណ្ដាមេដឹកនាំគណបក្សប្រជាធិបតេយ្យមកពីរដ្ឋជាច្រើន ដែលមានការប្រកួតប្រជែងយ៉ាងក្តៅគគុក និងអាចសម្រេចការបោះឆ្នោតបាន ដូចជារដ្ឋ Michigan រដ្ឋ Ohio និងរដ្ឋ Pennsylvania ជាដើមនោះ បានជំរុញឱ្យលោក Biden ប្រើប្រាស់ឥទ្ធិពលរបស់ខ្លួនជាមួយអ៊ីស្រាអែល ដើម្បីឈានទៅដល់បទឈប់បាញ់នៅត្រឹមម៉ោង ៥ល្ងាច កាលពីថ្ងៃអង្គារ (៣១ តុលា)។

នៅក្នុងលិខិតចំហមួយ ដែលមានចំណងជើងថា «ឳសានវាទបទឈប់បាញ់ឆ្នាំ២០២៣» បណ្ដាមេដឹកនាំមូស្លីមបានសន្យាថានឹងប្រមូលផ្តុំ «អ្នកបោះឆ្នោតជនជាតិមូស្លីម អារ៉ាប់ និងសម្ព័ន្ធមិត្ត» ដើម្បី «រារាំងការយល់ព្រម ការគាំទ្រ ឬការបោះឆ្នោត» សម្រាប់បេក្ខជនណាមួយ ដែលគាំទ្រការវាយលុករបស់អ៊ីស្រាអែល ប្រឆាំងនឹងប្រជាជនប៉ាឡេស្ទីន។

សហគមន៍ពលរដ្ឋអារ៉ាប់ និងមូស្លីម សញ្ជាតិអាមេរិក បានសម្តែងការខកចិត្តយ៉ាងខ្លាំង ដែលលោក Biden មិនបានថ្កោលទោសការវាយប្រហាររបស់អ៊ីស្រាអែល លើតំបន់ហ្កាហ្សា ស្ទ្រីប។ លោកប្រធានាធិបតីអាមេរិករូបនេះបាននិយាយថា អ៊ីស្រាអែល មានសិទ្ធិការពារពលរដ្ឋរបស់ខ្លួន ប៉ុន្តែគួរតែការពារជនស៊ីវិលស្លូតត្រង់ប៉ាឡេស្ទីន នៅតំបន់ហ្កាហ្សា ដែលជាជនរងគ្រោះនៃជម្លោះរវាងអ៊ីស្រាអែល និងក្រុមហាម៉ាស នេះផងដែរ៕