អាល្លឺម៉ង់ ៖ អធិការបតីអាល្លឺម៉ង់ Olaf Scholz បានជំរុញឲ្យមានតំណាងអចិន្ត្រៃយ៍អាហ្រ្វិក នៅក្រុមប្រឹក្សាសន្តិសុខអង្គការសហប្រជាជាតិ អំឡុងដំណើរទស្សនកិច្ចផ្លូវរដ្ឋទៅកាន់ប្រទេសហ្គាណា កាលពីថ្ងៃអង្គារ (ទី៣១ ខែតុលា) ខណៈដែលប្រធានាធិបតីហ្គាណា លោក Nana Akufo-Addo ចង្អុលប្រាប់ពី «អ្នកលុកលុយ ដែលប្រើសិទ្ធិវេតូ» នៅក្នុងជម្លោះនានា ដូចជានៅអ៊ុយក្រែន និងនៅអ៊ីស្រាអែល ជាហេតុផល ដើម្បីឲ្យមានកំណែទម្រង់។

លោក Scholz បានចាប់ផ្តើមដំណើរទស្សនកិច្ចរដ្ឋ២ ទៅកាន់អនុតំបន់សាហារ៉ាអាហ្រ្វិក ក្នុងប្រទេសនីហ្សេរីយ៉ា កាលពីថ្ងៃអាទិត្យ (ទី២៩ ខែតុលា) ហើយបានទៅដល់រដ្ឋធានីអាក្រា (Accra) របស់ហ្គាណា កាលពីល្ងាចថ្ងៃចន្ទ (ទី៣០ ខែតុលា)។ នេះគឺជាការធ្វើដំណើរលើកទី៣ របស់លោកទៅកាន់តំបន់នេះ ក្នុងរយៈពេល ២ឆ្នាំ។

អំឡុងពិធីស្វាគមន៍ នៅឯ Jubilee House ដែលជាវិមានរបស់រដ្ឋាភិបាលហ្គាណា លោក Scholz បានគូសបញ្ជាក់នូវអ្វីដែលលោកហៅថា ការប្តេជ្ញាចិត្តរួមគ្នារបស់អាល្លឺម៉ង់ និងហ្គាណា ចំពោះសណ្តាប់ធ្នាប់អន្តរជាតិ ដោយផ្អែកលើច្បាប់។ លោកបានសាទរចំពោះការដាក់បញ្ចូលសហភាពអាហ្រ្វិក នាពេលថ្មីៗនេះក្នុងចំណោមក្រុមប្រទេសទាំង២០ ឬ G20 ប៉ុន្តែបានប្រាប់ថា តួនាទីអចិន្ត្រៃយ៍របស់អាហ្វ្រិក នៅក្នុងក្រុមប្រឹក្សាសន្តិសុខអង្គការសហប្រជាជាតិ ក៏ចាំបាច់ត្រូវមានផងដែរ។

មេដឹកនាំហ្គាណាលោក Akufo-Addo បានអំពាវនាវឲ្យមានកំណែទម្រង់ទូលំទូលាយបន្ថែមទៀត ដោយគូសបញ្ជាក់ពីការកំណត់របស់ក្រុមប្រឹក្សា នៅពេលត្រូវដោះស្រាយជម្លោះ ដែលអ្នកបង្កហេតុ អាចមានអំណាចវេតូ។ ហើយខណៈថ្កោលទោសដល់ការលុកលុយរបស់រុស្ស៊ីលើអ៊ុយក្រែន និងការវាយប្រហាររបស់ក្រុមសកម្មប្រយុទ្ធហាម៉ាសលើអ៊ីស្រាអែល លោកបានសង្កត់ធ្ងន់ពីតម្រូវការឲ្យមានសេចក្ដីសម្រេចដោយសន្តិវិធី ចំពោះវិបត្តិទាំង២ ដោយមិនបំពានលើការសម្រេចរបស់ក្រុមប្រឹក្សាសន្តិសុខ៕,