មន្ទីរបញ្ចកោណ នៅថ្ងៃព្រហស្បតិ៍នេះ បានបញ្ជាក់ពីការវាយប្រហារលើកទី២៨លើកងកម្លាំងសហរដ្ឋអាមេរិកនៅក្នុងប្រទេសអ៊ីរ៉ាក់ និងស៊ីរី ចាប់តាំងពីថ្ងៃទី១៧ ខែតុលា។

មន្ត្រីក្រសួងការពារជាតិអាមេរិក បានបញ្ជាក់ប្រាប់សារព័ត៌មាន Fox News ថា យានដ្រូនមួយគ្រឿង បានវាយប្រហារមូលដ្ឋានយោធា al-Tanf របស់សហរដ្ឋអាមេរិក នៅទីក្រុង Homs Governorate ប្រទេសស៊ីរី ប៉ុន្តែបាននិយាយថា មិនមានការខូចខាតដល់សម្ភារៈបរិក្ខារ ឬបុគ្គលិករបស់សហរដ្ឋអាមេរិកទេ។

ទីភ្នាក់ងារសារព័ត៌មានគាំទ្រកងជីវពលអ៊ីរ៉ាក់ Sabereen បានឲ្យដឹងថា យានដ្រូនចំនួនពីរគ្រឿង បានកំណត់គោលដៅលើមូលដ្ឋាននេះ ប៉ុន្តែមន្ត្រីក្រសួងការពារជាតិ បាននិយាយថា វាគឺជាយានដ្រូនតែមួយ គ្រឿងគត់ ដែលបានវាយប្រហារ។ ឧបទ្ទវហេតុនេះ គឺជាការវាយប្រហារលើកទី២៨ លើកងកម្លាំងសហរដ្ឋអាមេរិក នៅក្នុងប្រទេសអ៊ីរ៉ាក់និងស៊ីរី ចាប់តាំងពីថ្ងៃទី១៧ ខែតុលា និងជាលើកទី៧ ចាប់តាំងពីការវាយប្រហារតាមអាកាសរបស់សហរដ្ឋអាមេរិក កាលពីយប់ថ្ងៃព្រហស្បតិ៍សប្តាហ៍មុន។

ប្រភពរដ្ឋាភិបាលអ៊ីរ៉ាក់មួយ ក៏បានប្រាប់សារព័ត៌មានរ៉យទ័រថា យានដ្រូនចំនួនពីរគ្រឿងដែលកំណត់គោល ទៅលើតំបន់ al-Tanf របស់ប្រទេសស៊ីរី ត្រូវបានស្ទាក់ចាប់ ឬបំផ្លាញដោយប្រព័ន្ធការពារមូលដ្ឋាននេះ កាលពីថ្ងៃពុធ។