​

ក្រុមហេសបូឡា នៅប្រទេសលីបង់ បាននិយាយកាលពីថ្ងៃព្រហស្បតិ៍ថា ខ្លួនបានធ្វើការវាយប្រហារជាច្រើនទៅលើទីតាំងកងទ័ពអ៊ីស្រាអែល ហើយប្រទេសអ៊ីស្រាអែល បានបើកការវាយប្រហារតាមអាកាសទៅលើប្រទេសលីបង់ភាគខាងត្បូង បណ្តាលឲ្យកើនឡើងអំពើហិង្សា។

កងទ័ពអ៊ីស្រាអែល បាននិយាយថា ខ្លួនបានឆ្លើយតបវិញទៅនឹងការបាញ់ផ្លោងចេញពីប្រទេសលីបង់ចូលទៅកាន់ប្រទេសអ៊ីស្រាអែល ដោយការវាយប្រហារតាមអាកាសទៅលើគោលដៅរបស់ក្រុមហេសបូឡា រួមជាមួយនឹងការបាញ់ដោយរថក្រោះ និងកាំភ្លើងធំ។

ក្រុមហេសបូឡា ដែលគាំទ្រដោយប្រទេសអ៊ីរ៉ង់ បាននិងកំពុងបាញ់តគ្នាជាមួយកងកម្លាំងអ៊ីស្រាអែលឆ្លងកាត់ព្រំដែនអ៊ីស្រាអែល-លីបង់ ចាប់តាំងពីក្រុមសកម្មប្រយុទ្ធហាម៉ាស់ប៉ាឡេស្ទីន និងអ៊ីស្រាអែល ធ្លាក់ចូលក្នុងសង្គ្រាមកាលពីថ្ងៃទី ៧ ខែតុលា ជាការកើនឡើងដ៏ឃោឃៅបំផុតនៅព្រំដែនចាប់តាំងពីសង្រ្គាមឆ្នាំ ២០០៦។

ទីភ្នាក់ងារសារព័ត៌មានជាតិរបស់ប្រទេសលីបង់ កាលពីថ្ងៃព្រហស្បតិ៍បានរាយការណ៍ថា មនុស្សបួននាក់បានស្លាប់ នៅជិតភូមិ Hula ភាគខាងត្បូង ក្នុងអំឡុងពេលការបាញ់ផ្លោងរបស់អ៊ីស្រាអែល។ ក្រុមអ៊ីស្លាមនិយមនិកាយស៊ីអ៊ីតប្រដាប់អាវុធធុនធ្ងន់ បាននិយាយនៅក្នុងសេចក្តីថ្លែងការណ៍ថា អ្នកប្រយុទ្ធរបស់ខ្លួនបានបើកការវាយប្រហារដំណាលគ្នាចំនួន១៩លើកទៅលើទីតាំងកងទ័ពអ៊ីស្រាអែល ដោយប្រើមីស៊ីលស៊ីបគោលដៅ កាំភ្លើងធំ និងអាវុធផ្សេងទៀត។ ការវាយប្រហាររបស់ក្រុមហេសបូឡា ដោយប្រើប្រាស់យានដ្រូនបំផ្ទុះ បានកើតឡើងប៉ុន្មានថ្ងៃបន្ទាប់ពីក្រុមនេះបាននិយាយជាលើកដំបូងថា ខ្លួនបានប្រើប្រាស់មីស៊ីលបាញ់ពីដីទៅអាកាសប្រឆាំងយានដ្រូនរបស់អ៊ីស្រាអែល។