ពោធិ៍សាត់៖ យុវជនកាកបាទក្រហម ចុះផ្សព្វផ្សាយសុវត្ថិភាពចរាចរណ៍ ជូនប្រជាពលរដ្ឋក្នុង​ព្រឹត្តិការណ៍​អុំទូក​ពោធិ៍សាត់ ខណៈនៅពីថ្ងៃទី៤ ដល់ថ្ងៃទី៥ ខែវិច្ឆិកានេះ រដ្ឋបាលខេត្តពោធិ៍សាត់ បាន​រៀបចំព្រឹត្តិការណ៍អុំទូកពោធិ៍សាត់ឆ្នាំ២០២៣ ដែលមានកម្មវិធីជាច្រើនដូចជា  ការ​ប្រណាំង​ទូក”ង”​ខ្នាតអន្តរជាតិ ពិព័រណ៍ភូមិ១ផលិតផល១ របស់បណ្តាលក្រុង-ស្រុកទាំង៧ ក្នុងខេត្ត ផ្ទាំង​ទស្សនីយភាពសិល្បះ​បុរាណ ការបង្ហាញក្បាច់គុនល្បុក្កតោខ្មែរ ការប្រគុំតន្ត្រីសម័យ និងការដុត​កាំជ្រួច​នា​ពេលរាត្រីជាដើម ដែលអាចអូសទាញប្រជាពលរដ្ឋទាំងក្នុងខេត្ត និងក្រៅខេត្តចូលរួម ទស្សនា​កំសាន្ត សប្បាយយ៉ាងច្រើនកុះករ ។

ដោយមានកិច្ចចង្អុលការពី ឯកឧត្តម ខូយ រីដា ប្រធានគណៈកម្មាធិការ​សាខា​កាក​បាទ​ក្រហម​កម្ពុជា​ខេត្ត​ពោធិ៍សាត់ក្នុងកំឡុងពេល២ថ្ងៃ នៃព្រឹត្តិការណ៍អុំទូកពោធិ៍សាត់ ឆ្នាំ២០២៣នេះ យុវជន​ស្ម័គ្រចិត្ត របស់សាខាកាកបាទក្រហមកម្ពុជាខេត្ត​ពោធិ៍សាត់ បានធ្វើយុទ្ធនាការចែក​ខិតប័ណ្ណ​ផ្សព្វ​ផ្សាយ បញ្ច្រាប់«ការចូលរួមលើកកម្ពស់សុវត្ថិភាពចរាចរណ៍ផ្លូវគោក និងបរិយាប័ន្ន នៅកម្ពុជា» ជូនដល់ប្រជាពលរដ្ឋ ក្នុងគោលបំណងចូលរួមទប់ស្កាត់កាត់បន្ថយ​អត្រាស្លាប់ របួស ពិការ ដោយគ្រោះថ្នាក់ចរាចរណ៍ និងទប់ស្កាត់ការកេងប្រវ័ញ្ចផ្លូវភេទកុមារតាមប្រព័ន្ធអនឡាញ ព្រមទាំងគាំពារកុមារពីការកេងប្រវ័ញ្ចគ្រប់រូបភាព។ នេះបើតាមការលើកឡើង របស់ លោក គឹម សូរ ដែលជាមន្ត្រីប្រតិបត្តិសាខាទទួលបន្ទុកការងារ សុវត្ថិភាព ចរាចរណ៍ និងគ្រប់គ្រង​គ្រោះ​មហន្តរាយ នៃសាខាកាកបាទក្រហមកម្ពុជាខេត្តពោធិ៍សាត់ ក្នុងពេលដឹកនាំយុវជនស្ម័គ្រចិត្ត ចុះ​ចែក​ខិតប័ណ្ណជូនប្រជាពលរដ្ឋ ។

សូមបញ្ជាក់ដែរថា ដោយយកចិត្តទុកដាក់គិតគូពីសុវត្ថិភាពប្រជាពលរដ្ឋនោះ កន្លងសាខា​កាក​បាទ​ក្រហម​កម្ពុជាខេត្តពោធិ៍សាត់ តែងតែធ្វើការផ្សព្វផ្សាយ បញ្ច្រាប់«ការចូលរួម​លើក​កម្ពស់​សុវត្ថិភាព​ចរាចរណ៍ផ្លូវគោក និងបរិយាប័ន្ន នៅកម្ពុជា»​ ជូនដល់ប្រជាពលរដ្ឋតាមមូលដ្ឋានក្រុង-ស្រុក ទាំង៧ក្នុងខេត្តពោធិ៍សាត់ ជាពិសេសនោះគឺផ្តោតលើសិស្សានុសិស្សនៅតាម សាលារៀន នានាទូទាំងខេត្តផងដែរ ៕