ក្រុមប្រមុខយោធាអ៊ុយក្រែន កំពុងប្រឈមការរិះគន់កាន់តែខ្លាំងឡើង​ជុំវិញ​កា​រ​វាយ​ប្រហារ​ដោយ​មីស៊ីល​រប​ស់រុស្ស៊ីនាពេលថ្មីៗនេះ ដែលត្រូវគេជឿថា​បាន​បណ្តាល​ឱ្យ​ទាហាន​អ៊ុយក្រែន​ជា​ច្រើន​នាក់​ស្លាប់។  

ប្រព័ន្ធផ្សព្វផ្សាយអ៊ុយក្រែន និងអ្នកសរសេរប្លុកយោធារុស្ស៊ីបាននិយាយថា ទាហាន​អ៊ុយក្រែន​ជាង​ ២០នាក់ បានស្លាប់ នៅក្នុងពិធីប្រគល់រង្វាន់កាលពីថ្ងៃសុក្រនៅជិតសមរភូមិជួរមុខភាគខាងត្បូង។

យោធាអ៊ុយក្រែន ពុំទាន់ផ្តល់តួលេខជនរងគ្រោះអំពីអ្វីដែលខ្លួននិយាយថាជា សោកនាដកម្ម នៅ​ក្នុង​តំបន់ហ្សាប៉ូឌីហ្សា (Zaporizhzhia) នោះទេ។

លោកប្រធានាធិបតី Volodymyr Zelensky បាននិយាយថាឧបទ្ទហេតុនេះ អាច​ត្រូវ​បាន​ជៀស​វាង​បាន។

ក្រុមមេដឹកនាំអ៊ុយក្រែនបានបន្ថែមនៅក្នុងការបង្ហោះនៅលើប្រព័ន្ធផ្សព្វផ្សាយសង្គមកាលពីថ្ងៃអាទិត្យថា ដំណើរការព្រហ្មទណ្ឌត្រូវបានផ្តួចផ្តើមឡើង ។

ទាហាន និងក្រុមអ្នកជំនាញយោធាអ៊ុយក្រែនមួយចំនួននិយាយថា ពិធីនេះ​មិន​គួរ​ធ្វើ​នៅ​ក្នុង​តំបន់​ដែល​មាន​ហានិភ័យ នៃការវាយប្រហារខ្លាំងនោះទេ។

ពួកគេនិយាយថា ក្រុមមន្ត្រីអ៊ុយក្រែនគួរតែបានដឹងហើយថា យានដ្រូនរបស់រុស្ស៊ី កំពុង​តាម​ដាន​សកម្មភាព​របស់កងទ័ពអ៊ុយក្រែន នៅក្បែរសមរភូមិជួរមុខ ដើម្បីដាក់គោល​ដៅ​វាយ​ប្រហារ​តាម​អាកាស និងកាំភ្លើងធំ៕