ឥណ្ឌា ៖ រដ្ឋ ២ ក្នុងចំណោមរដ្ឋចំនួន ៥ របស់ប្រទេសឥណ្ឌា ដែលគ្រោងជ្រើសរើសអង្គនីតិបញ្ញាត្តិថ្មី ក្នុងខែនេះ បានចាប់ផ្តើមការបោះឆ្នោតហើយ នៅថ្ងៃអង្គារ (ទី៧ ខែវិច្ឆិកា) ដែលជាការសាកល្បងដ៏ធំមួយនៃឱកាសទទួលបានជ័យជម្នះរបស់នាយករដ្ឋមន្ត្រីលោក Narendra Modi សម្រាប់អាណត្តិទី៣ នៅក្នុងការបោះឆ្នោតជាតិ ដែលរំពឹងថា នឹងកើតមាននៅខែឧសភា ឆ្នាំ២០២៤។

លោក Modi និងបណ្ដាមេដឹកនាំនៃគណបក្សប្រឆាំងដ៏ធំ Congress ដែលដឹកនាំដោយលោក Rahul Gandhi បានធ្វើដំណើរឆ្លងកាត់រដ្ឋចំនួន៥ ដោយបានថ្លែងសុន្ទរកថាក្នុងយុទ្ធនាការឃោសនាបោះឆ្នោត និងបានសន្យាឲ្យមានការផ្ដល់សាច់ប្រាក់ ការលើកលែងប្រាក់កម្ចីកសិកម្ម ការឧបត្ថម្ភធន និងតម្លៃធានារ៉ាប់រង ក្នុងចំណោមការសន្យាដទៃផ្សេង ដើម្បីទាក់ទាញអ្នកបោះឆ្នោត។

លោក Gandhi បានប្រឹងប្រែងយ៉ាងខ្លាំង ដើម្បីធ្វើឲ្យគណបក្ស Congress មានភាពរឹងមាំឡើងវិញ គិតចាប់តាំងពីការបោះឆ្នោតសកលឆ្នាំ២០១៩ និងបានជួយបង្កើតសម្ព័ន្ធភាពគណបក្សប្រចាំតំបន់ចំនួន២៨ ដើម្បីផ្តល់ឲ្យគណបក្ស Bharatiya Janata របស់លោក Modi នូវការប្រកួតប្រជែងដ៏ស្វិតស្វាញ នៅឆ្នាំ២០២៤។ តែយ៉ាងណាក្ដី ការស្ទង់មតិបង្ហាញថា លោក Modi នៅតែមានប្រជាប្រិយភាព បន្ទាប់ពីកាន់អំណាចមួយទសវត្សរ៍ ហើយទំនងជានឹងឈ្នះ ក្នុងការបោះឆ្នោតអាណត្តិទី៣ នេះ។

ប្រជាជនជាង ១៦០លាននាក់ ឬប្រមាណជា ១ភាគ៥នៃអ្នកបោះឆ្នោតសរុបរបស់ឥណ្ឌា មានសិទ្ធិបោះឆ្នោតក្នុងការស្ទង់មតិថ្នាក់តំបន់ ដែលត្រូវធ្វើឡើង ៤ដំណាក់កាល រហូតដល់ថ្ងៃទី៣០ ខែវិច្ឆិកា។ ការបោះឆ្នោតនៅក្នុងរដ្ឋទាំង៥ នឹងត្រូវរាប់ នៅថ្ងៃទី៣ ខែធ្នូ ហើយលទ្ធផលរំពឹងនឹងចេញឲ្យដឹង នៅថ្ងៃដដែលនោះ៕