ប្រជាជនអ៊ីស្រាអែលនៅទីក្រុងហ្សេរ៉ុយសាឡឹម (Jerusalem) និងទីក្រុង តេល អាវីវ (Tel Aviv) កាលពីថ្ងៃអង្គារ ៧ វិច្ឆិកា បាន​ប្រារព្ធ​ខួបមួយ​ខែ​ចាប់​តាំង​ពីកា​រ​វាយ​ប្រហារ​ដ៏សាហាវ​ពី​សំណាក់​ក្រុម​សកម្មប្រយុទ្ធហាម៉ាស ដោយរំឭកដល់ក្រុមជនរងគ្រោះ និងចំណាប់ថ្នូរ​ដោយ​ការ​ធ្វើ​បាតុកម្ម និងពិធីអុជទៀន។     

មនុស្សរាប់រយនាក់បានប្រមូលផ្តុំគ្នានៅខាងក្រៅសភារបស់អ៊ីស្រាអែល ក្នុងទីក្រុង Jerusalem កាល​ពី​ល្ងាចថ្ងៃអង្គារ ភាគច្រើននៃពួកគេ តវ៉ាប្រឆាំងនឹងភាពអសកម្មរបស់រដ្ឋាភិបាល និង​ការ​បរាជ័យ​ជុំវិញព្រឹត្តិការណ៍ដ៏តក់ស្លុតកាលពីថ្ងៃទី ៧ខែតុលា។

អ្នកស្រី ហានណា កាស្មាន់ (Hannah Katsman) ដែលកូនប្រុសរបស់អ្នកស្រីឈ្មោះហាយីម កាស្មាន់( Hayim Katsman) ត្រូវបានសម្លាប់នៅក្នុងផ្ទះ របស់ខ្លួន ដោយពួកសកម្មប្រយុទ្ធ នោះ បាន​និយាយថា អ្នកស្រីចង់ឱ្យលោកនាយករដ្ឋមន្រ្តី បេន ចាមីន ណេតានយ៉ាហ៊ូ (Benjamin Netanyahu) ទទួលខុសត្រូវចំពោះរឿងទាំងអស់នេះ ។

នៅកណ្តាលទីក្រុង Tel Aviv មនុស្សរាប់សិបនាក់​បាន​ប្រមូល​ផ្ដុំ​គ្នា​ជុំវិញ​វិមាន​អនុស្សាវរីយ៍​បណ្តោះ​អាសន្ន ដើម្បីអុជទៀន។ 

យោងតាមអាជ្ញាធរប៉ាឡេស្ទីន ក្រុមសកម្មប្រយុទ្ធហាម៉ាស បានសម្រុកចូលតាម​សហគមន៍​នានារ​ប​ស់​អ៊ីស្រាអែល ក្បែរតំបន់ហ្កាហ្សាកាលពីថ្ងៃទី ៧ ខែតុលា ដោយបានសម្លាប់មនុស្ស ១.៤០០ នាក់ ចាប់មនុស្សជាចំណាប់ថ្នូរជាង២០០ នាក់ និងបង្ក​ឱ្យមា​នចំ​ណាត់​ការ​តប​ពី​ខាង​យោធា​អ៊ីស្រាអែល​ដែលបានសម្លាប់មនុស្សជាង១០.០០០នាក់ នៅក្នុងតំបន់ហ្កាហ្សា ត្រូវបានឡោមព័ទ្ធ​ដោយ​អ៊ីស្រាអែល៕