សៀមរាប៖ ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៣ នៅខេត្តសៀមរាប រយៈពេលពីរថ្ងៃ បានប្រព្រឹត្ដទៅដោយរលូន និងមានសណ្ដាប់ធ្នាប់ល្អប្រសើរគួរឱ្យកត់សំគាល់ ខណៈ​ដែលការអនុវត្តភារកិច្ចរបស់គណៈមេប្រយោគ គណៈអប្បមាទ និងជំនួយការអប្បមាទ ប្រកប​ដោយតម្លាភាព និងក្រមសីលធម៌វិជ្ជាជីវៈ ។

លោក លី ប៊ុណ្ណា ប្រធានមន្ទីរអប់រំយុវជននិងកីឡា ខេត្ដសៀមរាប បានឱ្យ​ដឹង​នៅ​ថ្ងៃ​ទី៨ ខែវិច្ឆិកា ឆ្នាំ២០២៣នេះ ថា គ្រប់មណ្ឌលប្រឡងបាន​ប្រព្រឹត្ត​ទៅ​យ៉ាងរលូន​ប្រកបដោយ​មាន​ការ​ទទួល​ខុស​ត្រូវ​ខ្ពស់តម្លាភាព និងយុត្តិធម៌។ លោកបន្ដថា រយៈពេលពីថ្ងៃនេះ គេសង្កេតឃើញ​បេក្ខជន​ប្រលង​​​នៅតាមមណ្ឌលនិមួយៗ មានសណ្តាប់ធ្នាប់ល្អ ក្រោមការ​យក​ចិត្ត​ទុក​ដាក់​ខ្ពស់​របស់​ក្រុម​សហភាព​សហព័ន្ធយុវជនកម្ពុជា និងក្រុមគណៈកម្មការ មេប្រយោគ រួមទាំងមន្ត្រី អង្គភាព​ប្រឆាំង​អំពើ​ពុក​រលួយ បានយកចិត្តទុកដាក់ខ្ពស់ ចំពោះបេក្ខជនចូលប្រលងផងដែរ។ បេក្ខជនទាំងអស់ បាន​គោរពវិន័យផ្ទៃក្នុង នៅពេល​ប្រឡង​ឲ្យ​បាន​ល្អ​។ គ្រប់​មណ្ឌ​ល​បាន​ដឹក​វិញ្ញាសា​ចេញ​ពី​សាលា​ខេត្ត​សៀមរាប​ទៅកាន់មណ្ឌលនានាដោយសុវត្ថិភាព និងទាន់ពេលវេលា។ កិច្ចការ​របស់​បេក្ខជន​ត្រូវ​បាន​វេច​ខ្ចប់តាមគោលការណ៍បច្ចេកទេស និងបានយកមក​ផ្ញើ​នៅ​សាលាខេ​ត្ត​វិញ​ដោយ​សុវត្ថិភាព​។

បេក្ខជនប្រលងនៅមណ្ឌលវិទ្យាល័យ១០មករាឆ្នាំ១៩៧៩ បានលើកឡើងថា ពួក​គាត់​មាន​ការ​ពេញ​ចិត្ដ​ចំពោះការរៀបចំប្រលងសញ្ញាបត្រមធ្យមសិក្សាទុតិយភូមិនេះ ដែលធ្វើ​ឱ្យ​ពួក​គាត់​ទទួល​បាន​បទ​ពិសោធន៍មួយល្អប្រចាំជីវិត បើទោះបីការប្រឡង​នេះ​មាន​ការ​រិត​បន្ដឹង​ក៏​ដោយ។​ ពួក​គាត់​ថា ការរិត​បន្ដឹង​នូវ​ការ​ប្រលង​ជា​មោទកភាព​របស់​ពួក​គាត់​តាម​គោលការណ៍​ក្រសួង​អប់រំ​ យុវជន និង​កីឡា​ អ្នកចេះគឺជាប់។

យោងតាមរបាយការណ៍របស់មន្ទីរអប់រំយុវជនកីឡាខេត្តសៀមរាប ស្តីពី​កិច្ច​ដំណើរ​ការ​សំណេរ​ប្រឡង​សញ្ញា​បត្រមធ្យមសិក្សាទុតិយភូមិ បានបង្ហាញថា ក្នុងរយៈពេល២​ថ្ងៃ​នៃ​ការ​ប្រឡង​មធ្យម​សិក្សា​ទុតិយភូមិ មានបេក្ខជនអវត្ដមានចំនួន១៤៦នាក់ ក្នុងនោះ​បេក្ខជន​ចំណេះ​ទូទៅ​អវត្ត​មាន​ ២៦​នាក់ និងមានបេក្ខជនស្វ័យរិន និងបំពេញវិជ្ជាអវត្តមាន១២០នាក់ ខណៈដែល​មេ​ប្រយោគ​អវត្ដ​មាន​សរុបចំនួន៩នាក់។

សូមបញ្ជាក់ថា ការប្រឡង​សញ្ញាបត្រ​មធ្យម​សិក្សាទុតិយភូមិ​សម័យប្រឡង​៖ ៦ ​វិច្ឆិ​កា ២០២៣​នេះ ​មានបេក្ខជនចូលរួមចំនួន១០.៨១៩នាក់ ចែកជាមណ្ឌលប្រឡងចំនួន ១៦មណ្ឌល និង​៤៤៤​បន្ទប់៕