រុស្ស៊ីកាលពីថ្ងៃអង្គារ បានអះអាងពីការបើកការវាយប្រហារលើកងទ័ពអ៊ុយក្រែននៅគ្រប់មុខព្រួញ និងបានបំផ្លាញគ្រឿងយុទ្ធោបករណ៍ ខណៈភាគីអ៊ុយក្រែន បាននិយាយថា កងទ័ពរបស់ខ្លួនបានទទួលជោគជ័យនៅក្នុងការវាយទប់ការវាយលុករបស់រុស្ស៊ីពីគ្រប់មុខព្រួញនៅក្នុងរយៈពេល២៤ម៉ោងកន្លងទៅនេះ។

ក្រសួងការពារជាតិរុស្ស៊ី បានរាយការណ៍នៅក្នុងសន្និសីទសារព័ត៌មានខ្លីមួយ កាលពីថ្ងៃអង្គារថា កងទ័ពរបស់ខ្លួនបានវាយប្រហារលើបុគ្គលិកយោធាអ៊ុយក្រែន និងបានបំផ្លាញគ្រឿងយុទ្ធោបករណ៍អ៊ុយក្រែនជាច្រើនគ្រឿង ដូចជា រថពាសដែក រថក្រោះ និងកាំភ្លើងធំនៅមុខព្រួញ គូពីយ៉ាំង លីម៉ាន់ និងលូហាន។

យោងតាមក្រសួងការពារជាតិ បានឲ្យដឹងថា ក្រៅពីនេះ កងទ័ពរុស្ស៊ីក៏បានទទួលជោគជ័យផងដែរក្នុងការវាយទប់ការវាយប្រហាររបស់អ៊ុយក្រែនក្នុងមុខព្រួញដូណេត ។

នៅថ្ងៃជាមួយគ្នានេះដែរ យោងតាម របាយការណ៍សង្ខេបចេញពីអគ្គសេនាកងទ័ពអ៊ុយក្រែន បានឲ្យដឹងថា កងទ័ពអ៊ុយក្រែនបានវាយទប់ការវាយប្រហាររបស់រុស្ស៊ីនៅ៥មុខព្រួញយ៉ាងមានប្រសិទ្ធិភាព ក្នុងនោះ មុខព្រួញ គូពីយ៉ាំង បាក់មុត និងអាវឌីអ៊ិវកាផងដែរ។

តាមការផ្ដល់សេចក្ដីសង្ខេបបច្ចុប្បន្នភាពបានឲ្យដឹងថា ខណៈនេះ កងទ័ពអាកាសអ៊ុយក្រែន បានធ្វើការវាយប្រហារមួយចំនួន ដែលដាក់គោលដៅទៅលើ បុគ្គលិកយោធា ជំរំប្រមូលផ្ដុំអាវុធ និងប្រព័ន្ធមីស៊ីលការពារដែនអាកាស។ មីស៊ីល និងអង្គភាពកាំភ្លើងធំអ៊ុយក្រែន បានវាយប្រហារចំគោលដៅយោធា

រុស្ស៊ីដោយជោគជ័យ ដូចជា ស្ថានីយរ៉ាដា និងប៉ុស្ដិ៍ទីបញ្ជាការ។