អង្គភាពជំងឺមហារីកនៅមន្ទីរពេទ្យ Rantisi ស្ថិតក្នុងតំបន់ហ្គាហ្សា អស់ការផ្គត់ផ្គង់គ្រឿងវេជ្ជសាស្រ្តយ៉ាងឆាប់រហ័ស ធ្វើឲ្យអ្នកជំងឺរាប់សិបនាក់ ស្ថិតក្នុងហានិភ័យ ស្របពេលដែលអ៊ីស្រាអែលនៅតែបន្តការវាយប្រហារតាមច្រកអាកាសរបស់ខ្លួន ។ នេះបើយោងតាមការអះអាងរបស់ក្រុមគ្រូពេទ្យដែលធ្វើការនៅទីនោះ ។

អ្នកនាំពាក្យរបស់ក្រសួងសុខាភិបាលប៉ាឡេស្ទីនគ្រប់គ្រងដោយក្រុមហាម៉ាស់ និយាយថា មន្ទីរពេទ្យ Rantisi ទទួលបានការបញ្ជាពីកងទ័ពអ៊ីស្រាអែល ប្រាប់ថាឲ្យជម្លៀសខ្លួនចេញ ដោយលោកនិយាយថា វាបានធ្វើឲ្យជីវិតពលរដ្ឋតំបន់ហ្គាហ្សាដែលរត់ភៀសខ្លួនមកជ្រកកោននៅទីនេះ ស្ថិតក្នុងហានិភ័យខ្ពស់ ។

ក្រុមមន្រ្តីសុខាភិបាល និយាយថា អ៊ីស្រាអែល បានបើកការវាយប្រហារតាមច្រកអាកាស ២២៩លើក មកលើមណ្ឌលសុខភាព និងមន្ទីរពេទ្យ ចាប់តាំងពីថ្ងៃទី ៧ ខែតុលារហូតមក ។

យោធាអ៊ីស្រាអែល និយាយថា ពួកគេបានរកឃើញបណ្តាញផ្លូវក្រោមដីរបស់ក្រុមហាម៉ាស់ ទីបញ្ជាការ និងជើងទម្របាញ់គ្រាប់រ៉ុក្កែត ស្ថិតនៅក្រោម និងជិតមន្ទីរពេទ្យ នៅភាគខាងជើងតំបន់ហ្គាហ្សា ។

រយៈពេលមួយខែ ចាប់តាំងពីការចាប់ផ្តើមសង្គ្រាមអ៊ីស្រាអែលជាមួយក្រុមហាម៉ាស អង្គការសហប្រជាជាតិ បានអំពាវនាវសុំលទ្ធភាពមនុស្សធម៌ទៅតំបន់ហ្កាហ្សា ខណៈដែលនាយករដ្ឋមន្រ្តីអ៊ីស្រាអែល លោក បេនចាមីន ណេតានីយ៉ាហ៊ូ បានច្រានចោលការអំពាវនាវឲ្យមានបទឈប់បាញ់ ។

សូមបញ្ជាក់ថា ក្រសួងសុខាភិបាលប៉ាឡេស្ទីន និងអង្គការសហប្រជាជាតិ បាននិយាយកាលពីថ្ងៃអង្គារថា ចំនួនអ្នកស្លាប់នៅតំបន់ហ្គាហ្សា បានកើនលើស ១ម៉ឺននាក់ ៕