មនុស្សរាប់រយនាក់បានធ្វើការតវ៉ា កាលពីថ្ងៃពុធ (ទី៨ ខែវិច្ឆិកា) នៅខាងក្រៅទីស្នាក់ការគណបក្សសង្គមនិយមអេស្ប៉ាញ ក្នុងទីក្រុងម៉ាឌ្រីដ ប្រឆាំងនឹងការពិភាក្សា ដែលកំពុងបន្តធ្វើ ដើម្បីឲ្យមានការផ្តល់ការលើកលែងទោសដល់មនុស្ស ដែលមានពាក់ព័ន្ធនឹងការប៉ុនប៉ងមិនបានសម្រេច ក្នុងការទាមទារឯករាជ្យ ក្នុងឆ្នាំ២០១៧ របស់តំបន់កាតាឡាន់។

ក្រុមអ្នកតវ៉ា បានកាន់បដា និងស្រែកពាក្យស្លោកប្រឆាំងនឹងនាយករដ្ឋមន្ត្រីស្តីទី លោក Pedro Sanchez ដោយបដាទាំងនោះសរសេរថា «បញ្ជូនលោក Pedro Sanchez ទៅពន្ធនាគារ» ដើម្បីបង្ហាញពីការប្រឆាំងរបស់ពួកគេ ចំពោះកិច្ចចរចា រវាងគណបក្សសង្គមនិយម និងគណបក្ស Junts របស់លោក Carles Puigdemont។

ក្រុមបាតុករស្តាំនិយមមួយចំនួន បានគ្រវីទង់ជាតិអេស្ប៉ាញរបស់របប Franco (Francisco Franco) អំឡុងពេលតវ៉ា ខណៈដែលអ្នកតវ៉ាផ្សេងទៀត បានព្យាយាមបញ្ឈប់ទង្វើនោះ និងបង្ហាញពីការរួបរួមគ្នា ហើយរូបភាពបង្ហាញឲ្យឃើញពីក្រុមអ្នកសារព័ត៌មាន ត្រូវបានបង្ខំឲ្យចាកចេញពីការតវ៉ានោះ។

សូមបញ្ជាក់ថា ច្បាប់លើកលែងទោសនេះត្រូវបានស្នើឡើងដោយលោក Sanchez ដែលកំពុងព្យាយាមបង្កើតរដ្ឋាភិបាល បន្ទាប់ពីការបោះឆ្នោតកាលពីខែកក្កដា ដែលមិនមានអ្នកឈ្នះសំឡេងភាគច្រើនដាច់ខាត ហើយគោលបំណងនៃការស្នើច្បាប់នេះ គឺចង់ទទួលបានការគាំទ្រពីគណបក្សផ្តាច់ខ្លួននៃតំបន់កាតាឡាន់ចំនួន២៕