ក្រុមបរិស្ថាន និយាយថា ក្រុមហ៊ុន Shell ប្តឹងពួកគេទាមទារសំណងជំងឺចិត្តរាប់លានដុល្លារ ជុំវិញករណីដែលក្រុមសកម្មជនអាកាសធាតុឡើងលើនាវាផលិតប្រេងកាលពីដើមឆ្នាំនេះ ដោយពួកគេចាត់ទុកថា ចំណាត់ការនេះ ស្ថិតក្នុងចំណោមការគំរាមកំហែងផ្លូវច្បាប់ធំបំផុតនៅក្នុងប្រវត្តិសាស្រ្តរបស់ពួកគេ ។ 

 ដំបូងឡើយក្រុមហ៊ុន Shell បានដាក់ពាក្យបណ្តឹង ក្រោយក្រុមសកម្មជនបរិស្ថាន ឡើងលើនាវាកាលពីខែមករា នៅជិតប្រជុំកោះ Canary ដើម្បីតវ៉ាប្រឆាំងនឹងការខួងប្រេង ហើយនិងបានធ្វើដំណើរនៅលើនាវារហូតដល់ប្រទេសន័រវែស ។ 

 ក្រុមហ៊ុន Shell បានចាត់ទុកសកម្មភាពរបស់ក្រុមបរិស្ថានថាខុសច្បាប់ ហើយនិងគ្រោះថ្នាក់ខ្លាំង ដោយពួកគេបន្តថា សិទ្ធិធ្វើបាតុកម្មគឺជាមូលដ្ឋាន ហើយពួកយើងគោរពវាយ៉ាងពិតប្រាកដ ប៉ុន្តែវាត្រូវតែធ្វើដោយសុវត្ថិភាព និងស្របច្បាប់ ។ 

 នាវាមួយគ្រឿងនេះ មានគោលដៅទៅកាន់វាលប្រេង និងឧស្ម័ន Penguins ស្ថិតនៅក្នុងសមុទ្រខាងជើង ដែលត្រូវបានគេកំណត់ឲ្យផលិតប្រេងប្រហែល ៤៥.០០០បារ៉ែលក្នុង១ថ្ងៃ ។ 

 ក្រុមហ៊ុន Shell ប្តឹងទាមទារសំណង ២,១លានដុល្លារ ដែលរួមទាំងថ្លៃដោះស្រាយជាមួយក្រុមហ៊ុនជាច្រើនដែលពួកគេធ្វើការជាមួយ ដើម្បីដឹកជញ្ជូនទ្រព្យសម្បត្តិក្រុមបរិស្ថាននៅលើនាវា និងថ្លៃចំណាយផ្លូវច្បាប់ ។ 

 ក្រុមបរិស្ថាន និយាយថា ក្រុមហ៊ុន Shell បានផ្តល់ជូនផងដែរក្នុងការកាត់ពាក្យបណ្តឹងរបស់ខ្លួន បើសិនជាក្រុមសកម្មជនរបស់ពួកគេ មិនតវ៉ានៅតាមហេដ្ឋារចនាសម្ព័ន្ធក្រុមហ៊ុនថាមពលនៅក្នុងសមុទ្រ ឬនៅកំពង់ផែរ ៕