កាលពីថ្ងៃពុធម្សិលមិញ ប្រធានាធិបតីអ៊ីរ៉ង់លោក Ebrahim Raisi ដែលស្ថិតក្នុងដំណើរទស្សនកិច្ចទៅកាន់បណ្តាប្រទេសនៅអាស៊ីកណ្តាល ត្រូវបានស្វាគមន៍នៅទីក្រុង Dushanbe ដោយសមភាគីតាជីគីស្ថានរបស់លោកគឺលោក Emomali Rakhmon ។ 

 លោក Rakhmon បានកោតសរសើរការអភិវឌ្ឍន៍ប្រកបដោយវិជ្ជមាននៃទំនាក់ទំនងពាណិជ្ជកម្ម និងសេដ្ឋកិច្ចរវាងប្រទេសបងប្អូនទាំង ២ ស្របពេលដែលលោក Raisi បាននិយាយថា លោកពេញចិត្តនឹងធ្វើដំណើរមកកាន់រដ្ឋធានីរបស់តាជីគីស្ថានមួយនេះ ជាលើកទី ២ ។ លោកបានបង្ហាញក្តីសង្ឃឹមផងដែរក្នុងការពង្រឹងទំនាក់ទំនងទ្វេភាគីបន្ថែមទៀត ហើយនិងពិភាក្សាលើសារៈសំខាន់នៃបញ្ហាក្នុងតំបន់ទាំងសម្រាប់ទីក្រុងតេអេរ៉ង់ និងទីក្រុង Dushanbe ។ 

 ថ្លែងក្រោយជំនួប លោក Raisi និយាយថា អ៊ីរ៉ង់ និងតាជីគីស្ថាន ច្រើនជាងប្រទេសដទៃទៀតដែលខ្វាយខ្វល់ពីប្រជាពលរដ្ឋអាហ្វហ្គានីស្ថាន និងអនាគតរបស់ពួកគេ ។ 

 មេដឹកនាំទាំង ២និយាយថា ពួកគេបានចែករំលែកទស្សនៈរួមលើស្ថានភាពនៅតំបន់ហ្គាហ្សា ។ លោក Raisi បានចាត់ទុកជម្លោះរវាងប៉ាឡេស្ទីន និងអ៊ីស្រាអែល ថាជាបញ្ហាសម្រាប់ពិភពលោកទាំងមូល និងមនុស្សជាតិទាំងអស់ ។ លោកបានអំពាវនាវឲ្យមានការបញ្ចប់ជាបន្ទាន់ការបិទច្រកនៅតំបន់ហ្គាហ្សាស្រ្ទីប ហើយនិងចែកចាយជំនួយជាបន្ទាន់សម្រាប់ជនឡេស្ទីន ។ 

 ក្រោយដំណើរទស្សនកិច្ចនៅទីក្រុង Dushanbe លោក Raisi នឹងបន្តដំណើរទៅកាន់ទីក្រុង Tashkent របស់ប្រទេសអ៊ូសបេកគីស្ថាន ដើម្បីចូលរួមកិច្ចប្រជុំកំពូលអង្គការសហប្រតិបត្តិការសេដ្ឋកិច្ច(ECO)៕