ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសផ្ដល់សាច់ប្រាក់ទៅដល់ប្រជាពលរដ្ឋរងផលប៉ះពាល់ពីការរាតត្បាតនៃជំងឺកូវីដ-១៩ដែលកើតចេញពីព្រឹត្តិការណ៍សហគមន៍ ២០កុម្ភៈ។
ក្នុងសារលិខិតចេញនៅថ្ងៃនេះ សម្ដេចតេជោ ហ៊ុន សែន បានបញ្ជាក់ថា រាជរដ្ឋាភិបាលចាប់ផ្ដើមផ្ដល់សាច់ប្រាក់នៅក្រោម«កម្មវិធីជំនួយសង្គមជាសាច់ប្រាក់ក្រោយពេលបិទខ្ទប់»។
សម្ដេចតេជោ ហ៊ុន សែន បានបញ្ជាក់ឱ្យដឹងទៀតថា សាច់ប្រាក់ឧបត្ថម្ភនេះ នឹងចាប់ផ្ដើមផ្ដល់ជូនដល់ប្រជាពលរដ្ឋ និងគ្រួសារមានជីវភាពលំបាក ដែលកើតចេញពីការអនុវត្តវិធានការបិទខ្ទប់នៅរាជធានីភ្នំពេញ ក្រុងតាខ្មៅ និងក្រុងព្រះសីហនុ។
បើតាមសារលិខិតដដែលនេះ ប្រមុខរាជរដ្ឋាភិបាលកម្ពុជា ក៏បានសម្រេចផ្ដល់ថវិកាដល់ក្រុមកម្មករ និងនិយោជិតនៅក្នុងវិស័យកាត់ដេរសម្លៀកបំពាក់ ស្បែកជើង និងកាបូផងដែរ ដែលរងផលប៉ះពាល់ដោយសារវិធានការបិទខ្ទប់នៅក្នុងភូមិសាស្ត្រទាំង៣នេះផងដែរ។
ចំណែកឯប្រជាពលរដ្ឋ និងគ្រួសារប្រជាពលរដ្ឋដែលមានសមាជិកឆ្លងជំងឺកូវីដ-១៩ ឬបាត់បង់សមាជិកគ្រួសារដោយជំងឺកូវីដ-១៩ដែលពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ នឹងទទួលបានកញ្ចប់ថវិកាឧបត្ថម្ភពីរាជរដ្ឋាភិបាលផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
