បីទារកអាយុ ៩ខែក្នុងដៃរបស់គាត់ អ្នកស្រី Tatyana Tapalova ដែលជាស្រ្តីជនជាតិអ៊ុយក្រែន រង់ចាំដោយអត់ធ្មត់នៅច្រកព្រំដែន Rafah តំបន់ហ្គាហ្សា កាលពីថ្ងៃព្រហស្បតិ៍ រង់ចាំឱកាសគេចចេញពីសង្រ្គាមដែលហ៊ុព័ទ្ធទីក្រុងដែលគាត់ចាត់ទុកថាជាស្រុកកំណើតអស់រយៈពេលជាង ២០ឆ្នាំមកហើយ ។

ក្តីសង្ឃឹមរបស់អ្នកស្រី Tapalova បានរលាយសាបសូន្យ ពេលដែលគាត់ដឹងថា ឈ្មោះប្តីប៉ាឡេស្ទីនរបស់គាត់ មិនស្ថិតនៅក្នុងតារាងឈ្មោះអ្នកដែលអាចចាកចេញពីតំបន់ឡោមព័ទ្ធមួយនេះនោះទេ ។

អ្នកស្រីនិយាយថា គាត់គឺជាប្តីរបស់ខ្ញុំ ពួកយើងបានរៀបការ និងរួមរស់ជាមួយគ្នាអស់រយៈពេល ២៣ឆ្នាំមកហើយ ពួកយើងមានកូន ៥នាក់ តើហេតុអ្វីបានជាគាត់មិនមាននៅក្នុងតារាងឈ្មោះបែបនេះ? ហេតុអ្វីបានជាពួកគេចង់បំបែកបំបាក់គ្រួសាររបស់ពួកយើងទៅវិញ? 

ប្រភពព័ត៌មានពីក្រុមគ្រូពេទ្យ និងក្រុមសន្តិសុខអេហ្ស៊ីប បានឲ្យដឹងថា ការជម្លៀសខ្លួនចេញពីតំបន់ហ្គាហ្សា ចូលទៅក្នុងប្រទេសអេហ្ស៊ីប សម្រាប់អ្នកកាន់លិខិតឆ្លងដែនបរទេស និងជនប៉ាឡេស្ទីនដែលត្រូវការការព្យាយាម បានចាប់ផ្តើមឡើងវិញ តាមច្រកព្រំដែន Rafah កាលពីថ្ងៃព្រហស្បតិ៍ ក្រោយពីផ្អាកអស់រយៈពេល ១ថ្ងៃ ។

ប៉ុន្តែអ្នកស្រី Tapalova និយាយថា ជម្រើសរបស់គាត់មានដែនកំណត់ ពេលដែលគាត់ចាកចេញ ។

អ្នកស្រីនិយាយថា ខ្ញុំមិនចង់ធ្វើដំណើរចេញពីសង្រ្គាមមួយទៅកាន់សង្រ្គាមមួយទៀតនោះទេ ។ ខ្ញុំចង់ទៅកាន់ប្រទេសទី ៣ ខ្ញុំមិនចង់ទៅប្រទេសកំណើតអ៊ុយក្រែននោះទេ មិនទៅតំបន់ហ្គាហ្សា និងមិនទៅអ៊ុយក្រែននោះទេ ដោយសារតែសង្រ្គាម ។

គួរឲ្យដឹងថា ការជម្លៀសខ្លួនមនុស្សចេញពីតំបន់ហ្គាហ្សា ឆ្លងកាត់ច្រកព្រំដែន Rafah បានចាប់ផ្តើមកាលពីថ្ងៃទី ១ ខែវិច្ឆិកា សម្រាប់អ្នកកាន់លិខិតឆ្លងដែនបរទេស ពលរដ្ឋមានសញ្ញាតិ ២ និងមនុស្សនៅក្នុងបន្ទុករបស់ពួកគេប្រមាណជា ៧ពាន់នាក់ ក៏ដូចជាចំនួនកំណត់សម្រាប់អ្នកដែលត្រូវការព្យាបាលបន្ទាន់ ។

ច្រកព្រំដែន Rafah គឺជាច្រកចូលតែមួយគត់សម្រាប់មនុស្សធម៌ទៅកាន់តំបន់ហ្គាហ្សា ។

យោងតាមការអះអាងរបស់អង្គការសហប្រជាជាតិ(UN)បានឲ្យដឹងថា កាលពីថ្ងៃពុធ រថយន្តដឹកស្បៀងអាហារ ឱសថ និងទឹក ១០៦គ្រឿង បានធ្វើដំណើរឆ្លងកាត់ចូលទៅកាន់តំបន់ហ្គាហ្សា ធ្វើឲ្យចំនួនរថយន្តដឹកជំនួយសរុបដែលបានចូលទៅក្នុងតំបន់បិទច្រកមួយនេះចាប់តាំងពីថ្ងៃទី ២១ ខែតុលារហូតមក កើនឡើងដល់ ៧៥៦គ្រឿង ៕