នៅថ្ងៃទី១០ ខែវិច្ឆិកា ឆ្នាំ២០២៣ស្អែកនេះ ក្រសួងការងារ និងបណ្តុះបណ្តាលវិជ្ជាជីវៈ និងសភាពាណិជ្ជកម្មកម្ពុជារួមទាំងសមាគមនិយោជកសរុបចំនួន ១៨ស្ថាប័ន នឹងចុះអនុស្សរណៈ នៃការយោគយល់គ្នា (MOU) ដើម្បីផ្តល់ឱកាសហាត់ការ និងកម្មសិក្សាដល់សិស្សដែលរៀនវគ្គបណ្ដុះបណ្ដាលបច្ចេកទេសវិជ្ជាជីវៈដែលក្នុងនោះក៏មានដែរសិក្ខាកាមដែលនឹងចូលសិក្សាកម្មវិធីថ្នាក់ជាតិរបស់រាជរដ្ឋាភិបាលដែល នឹងបណ្តុះបណ្តាលបច្ចេកទេសវិជ្ជាជីវៈដល់ក្រុមគោលដៅយុវជនមកពីគ្រួសារក្រីក្រ និងងាយរងគ្រោះចំនួន ១.៥លាននាក់។
ថ្លែងក្នុងពិធីសំណេះសំណាលជាមួយកម្មករកាលពីថ្ងៃទី៧ ខែវិច្ឆិកា ឆ្នាំ២០២៣នេះ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងថា ការចុះMoU នេះមានគោលបំណងធានាថា សិស្សមិនត្រឹមតែអាចអនុវត្តនូវរោងជាងនៅឯសាលានោះទេ ប៉ុន្តែអាចអនុវត្តជាក់ស្តែង និងធ្វើការជាក់ស្ដែងនៅក្នុងវិស័យឯកជន ដែលនឹងផ្តល់ឱ្យវិស័យឯកជននូវឱកាស ដើម្បីពិនិត្យជ្រើសរើសសិស្សទាំងអស់នោះអាចចូលធ្វើការនៅក្រោយពេលដែលរៀនចប់វគ្គបណ្តុះបណ្តាល។
សូមបញ្ជាក់ថា តំណាងវិស័យឯកជនចំនួន១៨នេះ មានដូចជាសភាពាណិជ្ជកម្ម, សហព័ន្ធនិយោជក និងសមាគមពាណិជ្ជកម្មកម្ពុជា (CAMFEBA), សមាគមវាយនភណ្ឌសំលៀកបំពាក់ស្បែកជើង និងផលិតផលធ្វើដំណើរ (TAFTAC), សមាគមអ្នកសាងសង់កម្ពុជា, សមាគមអ្នកអភិវឌ្ឍន៍លំនៅឋានកម្ពុជា, សមាគមទេសចរណ៍, សមាគមសណ្ឋាគារកម្ពុជា, សហព័ន្ធចុងភៅកម្ពុជា, សមាគមភោជនីយដ្ឋានកម្ពុជា, និងសមាគមសហគ្រិនស្ត្រីកម្ពុជា៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
