លោក Yahya Sarea គឺជាអ្នកនាំពាក្យក្រុមឧទ្ទាមហ៊ូធីរបស់យេម៉ែន និយាយថា ពួកគេបានបើកការវាយប្រហារដោយមីស៊ីលបាលីស្ទិកលើគោលដៅជាច្រើនកន្លែងរបស់អ៊ីស្រាអែល ដែលរួមទាំងគោលដៅយោធាផងដែរនៅទីក្រុងភាគខាងត្បូង Eilat ។

លោក Sareaនិយាយថា កងកម្លាំងប្រដាប់អាវុធរបស់ពួកយើង ដោយមានជំនួយពីព្រះអាឡា បានវាយប្រហារដោយមីស៊ីលបាលីស្ទិកទៅលើគោលដៅដ៏រសើបជាច្រើនរបស់អង្គភាពយោធាអ៊ីស្រាអែល នៅដែនដីកាន់កាប់ភាគខាងត្បូង ដែលរួមទាំងគោលដៅយោធានៅទីក្រុង Eilat ។

លោកបន្តថា ដោយព្រះគុណព្រះអាឡា ប្រតិបត្តិការនេះ សម្រេចបានគោលដៅរបស់ខ្លួនដោយជោគជ័យ ហើយជាលទ្ធផលការវាយប្រហារត្រូវចំគោលដៅច្បាស់លាស់ បើទោះបីជាសត្រូវនៅស្ងៀមក៏ដោយ ។

លោកបញ្ជាក់ទៀតថា កងកម្លាំងប្រដាប់អាវុធយេម៉ែន នឹងបន្តប្រតិបត្តិការយោធារបស់ពួកគេ ដើម្បីគាំទ្រទុក្ខសោករបស់ជនប៉ាឡេស្ទីន រហូតដល់អ៊ីស្រាអែលបញ្ឈប់ការឈ្លានពានបងប្អូនរបស់ពួកយើងនៅតំបន់ហ្គាហ្សាស្រ្ទីប ។

យោធាអ៊ីស្រាអែល និយាយថា យានគ្មានអត្តសញ្ញាណ បានវាយប្រហារមកលើអគារជនស៊ីវិលនៅទីក្រុងភាគខាងត្បូង Eilat កាលពីថ្ងៃព្រសហ្បតិ៍ ហើយនិងបណ្តាលឲ្យមានការខូចខាតបន្តិចបន្តួច ។

ក្រុមឧទ្ទាមហ៊ូធីគាំទ្រដោយអ៊ីរ៉ង់ បានវាយប្រហារដោយមីស៊ីលម្តងហើយម្តងទៀត និងការវាយប្រហារដោយយានដ្រូនលើអ៊ីស្រាអែល ចាប់តាំងពីការផ្ទុះសង្រ្គាមរវាងអ៊ីស្រាអែល និងក្រុមហាម៉ាស់ កាលពីថ្ងៃទី ៧ ខែតុលា ។ ក្រៅពីការវាយប្រហារដោយយានដ្រូនកាលពីថ្ងៃព្រហស្បតិ៍ ការវាយប្រហារទាំងអស់ ត្រូវបានបាញ់ទម្លាក់ ឬធ្លាក់នៅជិត ។

យោធាអ៊ីស្រាអែល និយាយថា អត្តសញ្ញាណរបស់យានដ្រូនដែលបានវាយប្រហារមកលើអគារនៅទីក្រុង Eilat កំពុងស្ថិតក្រោមការពិនិត្យ ។ ពួកគេពុំបានបរិយាយច្រើននោះទេ ហើយក៏គ្មានសេចក្តីរាយការណ៍ពីអ្នករងរបួសនោះដែរ ៕