ភ្នំពេញ ៖ កងយោធពលខេមរភូមិន្ទ គ្រោងនឹងបញ្ជូនកងកម្លាំងនៃបញ្ជាការដ្ឋានទ័ពពិសេស និងកងកម្លាំង របស់បញ្ជាការដ្ឋានកងពលតូចលេខ៧០ នៃកងទ័ពជើងគោក នៃកងយោធពលខេមរភូមិន្ទជិត ១០០ នាក់រួមនឹងសម្ភារៈបរិក្ខារយោធាជាច្រើន ទៅកាន់តំបន់កាវតាន ទីក្រុងស៊ាន់ជាំង ខេត្តក្វាងតុង សាធារ ណរដ្ឋប្រជាមានិតចិន ដើម្បីចូលរួមក្នុងសមយុទ្ធ "សន្តិភាព មិត្តភាព២០២៣" អាមែនយូយី ២០២៣ "AMAN YOUYI 2023"។​

សមយុទ្ធនេះធ្វើឡើងក្រោមប្រធានបទ "ប្រតិបត្តិការយោធាចម្រុះលើការប្រឆាំងភេរវកម្ម និងការថែរ ក្សាសន្តិសុខលម្ហសមុទ្រ" ដែលមានរយៈពេល ១០ថ្ងៃ គឺចាប់ពីថ្ងៃទី១៣ ដល់ទី២២ ខែវិច្ឆិកា។ សមយុ ទ្ធរួមនេះរៀបចំធ្វើឡើងដោយកងទ័ពរំដោះប្រជាជនចិន និងមានការចូលរួមពីតំណាងអង្គការសហប្រ ជាជាតិ និងកងកម្លាំងកងទ័ពកម្ពុជា ឡាវ ម៉ាឡេស៊ី ថៃ និងវៀតណាមជាដើម។

ការត្រៀមចូលរួមសមយុទ្ធនេះ ត្រូវបានរាយការណ៍ឱ្យដឹងក្នុងពិធីសំណេះសំណាលនាថ្ងៃទី១០ ខែវិច្ឆិកា នៅបញ្ជាការដ្ឋានកងពលតូចលេខ៧០ ក្រោមអធិបតីភាពនាយឧត្តមសេនីយ៍ ឥត សារ៉ាត់ អគ្គមេប ញ្ជាការរង និងជានាយសេនាធិការចម្រុះ។ ក្នុងពិធីសំណេះសំណាលនេះ នាយឧត្តមសេនីយ៍ បានថ្លែងថា នេះគឺជាមោទនភាពដ៏ឧត្តុង្គឧត្តមណាស់ ហើយក៏ជាមុខមាត់ សម្រាប់ប្រជាជនកម្ពុជាផងដែរ ដែលកងយោធពលខេមរភូមិន្ទយើង ត្រូវបានមិត្តចិនអញ្ជើញឱ្យទៅចូលរួមក្នុងសមយុទ្ធពហុសាសន៍ដ៏មានសារៈសំខាន់នេះ។

នាយឧត្តមសេនីយ៍បន្តថា នេះមិនមែនជាលើកទីមួយទេ ដែលកងយោធពលខេមរភូមិន្ទយើង បានចេ ញទៅចូលរួមក្នុងសមយុទ្ធពហុសាសន៍ ដែលមានបណ្ដាប្រទេសជាច្រើនចូលរួម ដូច្នេះយើងជឿជាក់ថា កម្លាំងរបស់យើងនឹងចូលរួមក្នុងប្រតិបត្តិការសមយុទ្ធនេះប្រកបដោយជោគជ័យ។

នាយឧត្តមសេនីយ៍ក៏បានកោតសរសើរចំពោះក្រុមការងារដែលបានសហការគ្នាយ៉ាងល្អ ក្នុងការរៀបចំទាំងកម្លាំង និងសម្ភារៈបរិក្ខារយោធា ដើម្បីធានាឱ្យការចេញដំណើរទៅចូលរួមក្នុងសមយុទ្ធនេះ ប្រព្រឹ ត្តទៅដោយរលូន៕ ដោយ៖ បាន ចក់