កងកម្លាំងស្វ័យការពាររបស់ប្រទេសជប៉ុន (SDF) នៅថ្ងៃអាទិត្យ (១២ វិច្ឆិកា) នេះ បានធ្វើសមយុទ្ធជម្លៀសនិម្មិតពីរលកយក្សស៊ូណាមិ នៅលើកោះ យ៉ូណាហ្គូនី (Yonaguni) ក្បែរកោះតៃវ៉ាន់ នៅក្នុងសមយុទ្ធដែលក្រុមមន្ត្រីក្នុងតំបន់បាននិយាយថា អាចជួយអ្នកស្រុកឆ្លើយតបចំពោះការវាយប្រហាររបស់ចិន នាពេលអនាគតលើកោះជិតខាងរបស់ពួកគេ។

កោះ យ៉ូណាហ្គូនី គឺជាកោះចុងបស្ចឹមរបស់ប្រទេសជប៉ុន ដែលមានចម្ងាយត្រឹមតែ ១១០គីឡូម៉ែត្រប៉ុណ្ណោះពីកោះតៃវ៉ាន់។ កោះដាច់ស្រយាលរបស់ជប៉ុនមួយនេះ ក៏ស្ថិតនៅជិតទីក្រុងម៉ានីល និងទីក្រុងហុងកុង ជាងទីក្រុងតូក្យូ ដែលមានចម្ងាយជាង ២.០០០គីឡូម៉ែត្រពីកោះនោះ។ 

យោងតាមលោក កូជី ស៊ូហ្កាម៉ា (Koji Sugama) មន្ត្រីកោះ យ៉ូណាហ្គូនី ទទួលបន្ទុកត្រៀមទប់ទល់មហន្តរាយសម្រាប់ប្រជាជនជាង ១.៧០០នាក់ នៅកោះនេះបាននិយាយថា ក្រុមមន្រ្តីកោះ និងទាហានពីកងកម្លាំងស្វ័យការពារ SDF ប្រហែល ២០០នាក់ បានចូលរួមក្នុងសមយុទ្ធនេះ។

កាលពីខែសីហា ឆ្នាំមុន ចិនបានបាញ់មីស៊ីលចូលសមុទ្រជិតកោះ យ៉ូណាហ្គូនី ជាការឆ្លើយតបនឹងដំណើរទស្សនកិច្ចរបស់អតីតប្រធានសភាអាមេរិក លោកស្រី Nancy Pelosi នៅកោះតៃវ៉ាន់។ 

សកម្មភាពទាំងនោះ រួមជាមួយនឹងការព្រួយបារម្ភថា ការវាយប្រហាររបស់រុស្ស៊ី លើអ៊ុយក្រែន អាចជំរុញទីក្រុងប៉េកាំង ឱ្យវាយលុកកោះតៃវ៉ាន់ បានជំរុញឱ្យនាយករដ្ឋមន្ត្រីជប៉ុន លោក Fumio Kishida ក្នុងខែធ្នូ បង្ហាញពីផែនការបង្កើនការចំណាយលើវិស័យការពារជាតិទ្វេដងក្នុងរយៈពេល ៥ឆ្នាំខាងមុខ៕